QR Oqý-aǵartý mınıstrliginde Kámeletke tolmaǵandardyń isteri jáne olardyń quqyqtaryn qorǵaý jónindegi vedomstvoaralyq komısıanyń 2025 jylǵy alǵashqy otyrysy ótti.
Onyń jumysyna ortalyq memlekettik jáne jergilikti atqarýshy organdardyń, úkimettik emes uıymdardyń ókilderi qatysty.
Jıynda kámeletke tolmaǵandar arasyndaǵy quqyq buzýshylyqtardyń, qadaǵalaýsyz jáne panasyz qalýdyń aldyn alý, sondaı-aq balalardyń qaýipsizdigi men ál-aýqatyn qamtamasyz etýge baǵyttalǵan júıeli sharalar talqylandy, dep habarlaıdy aqshamnews.kz Oqý-aǵartý mınıstrligine silteme jasap.
Resmı statısıkaǵa sáıkes, sońǵy 10 jylda eldegi jasóspirimder qylmysynyń deńgeıi úsh esege tómendegen. Quqyqbuzýshylyqtardy anyqtaý jáne tirkeý kórsetkishiniń ósýine qaramastan, 2024 jyldyń qorytyndysy boıynsha qosymsha 5%-ǵa azaıǵany baıqalady. Degenmen, Jetisý, Ulytaý, Pavlodar, Aqmola, Qaraǵandy oblystary, sondaı-aq Astana jáne Shymkent qalalarynda áli de naqty jáne maqsatty sheshimderdi talap etetin máseleler bar.
İshki ister mınıstrliginiń ókili atap ótkendeı, elimizde kámeletke tolmaǵandar arasyndaǵy quqyqbuzýshylyqtardyń aldyn alý boıynsha keshendi jumys júrgizilýde. Alaıda, áleýmettik ortanyń qarqyndy ózgerýi bul úderiste memlekettik organdardan bastap ata-analarǵa deıingi barlyq taraptardyń belsendi qatysýyn qajet etedi. Bul tásil QR Oqý-aǵartý mınıstrligine qarasty Balalardyń quqyqtaryn qorǵaý komıtetiniń taldamalyq materıaldarynda da kórinis tapqan.
Komısıa aǵymdaǵy jaǵdaıdy, jasóspirimder arasyndaǵy quqyqqa qarsy minez-qulyqtyń negizgi sebepterin egjeı-tegjeıli zerdelep, olardy áleýmettendirý jáne aldyn alý boıynsha praktıkalyq qadamdar usyndy.
Otyrysty qorytyndylaı kele, QR Oqý-aǵartý mınıstri Ǵanı Beısembaev jergilikti atqarýshy organdarǵa aldyn alý sharalaryn kúsheıtip, jumysty júıeli negizde júrgizýdi tapsyrdy. Ol quqyqtyq aǵartýǵa, tárbıelik jumystarǵa jáne bos ýaqytty tıimdi uıymdastyrýǵa erekshe nazar aýdarý qajet ekenin atap ótti. Sonymen qatar, mektepterdegi ata-analardy pedagogıkalyq qoldaý ortalyqtarynyń jáne aımaqtyq psıhologıalyq qyzmetterdiń jumysyn jandandyrýǵa basymdyq berildi.