1972 jylǵy Olımpıadada basketboldan erler arasyndaǵy fınaldyq oıynda qazaq Áljan Jarmuhamedov te boldy.
1972 jylǵy Olımpıada oıyndarynyń basketboldan erler arasyndaǵy fınaldyq oıynda AQSH pen KSRO komandalary kezdesedi. AQSH quramasy sózsiz favorıt sanaldy. Sebebi 1936 jyldan beri, ıaǵnı basketbol jazǵy oıyndar baǵdarlamasyna qosylǵannan bastap, amerıkalyq sportshylar eshqashan jeńilmegen.
Olar qatarynan 7 ret altyn alyp, jeńis serıasyn KSRO-ǵa qarsy sheshýshi kezdesýge deıin 63 oıynǵa deıin jetkizgen. Alaıda, Keńes quramasy da álsiz bolmady. Tájirıbeli Sergeı jáne Aleksandr Belovtar bastaǵan komanda kem degende 7 jyldaı qurama sapynda birge oınap, sheber ujymǵa aınalǵan. Olardyń sapynda qazaq basketbolshysy Áljan Jarmuhamedov te boldy.
Sheshýshi kezdesý Olımpıada úshin arnaıy salynǵan jáne 7 myńǵa jýyq kórermen syıatyn Múnhendegi «Rýdı-Zedlma- ıer-Halle» arenasynda ótti. Qarsylas komandanyń favorıt ekenine qaramastan, oıynnyń basynan-aq keńestik oıynshylar ózderin belsendi kórsete bildi. Alǵashqy úsh mınýttan soń esep KSRO basymdylyǵymen 5:0 boldy. Amerıkalyq oıynshylardyń qarymta shabýyldaryna qaramastan, oıyn boıy keńestik basketbolshylar 4:8 upaıǵa alda otyrdy. Kezdesýdiń birinshi jartysy 26:21 esebimen aıaqtaldy. Machtyń ekinshi jartysy da sońǵy mınýttarǵa deıin dál osyndaı keıipte ótti. Tek oıynnyń bitýine 6 sekýnd qalǵanda 49:48 esebimen jeńip turǵan KSRO quramasy Aleksandr Belov qateliginen keıin oıyn boıy alǵash ret artta qaldy.
Esep taqtasynda kezdesý sońyna deıin 3 sekýnd qalǵany kórsetildi. Biraq bul taqtada birneshe ret tehnıkalyq aqaýlar bolyp, dop oıynǵa 3 qaıtara engizildi. Úsh márte dopty oıynǵa qosqan Edeshkonyń bul jolǵy pasy bar alańdy ushyp ótip, Aleksandr Belovqa dál jetti de, keńestik basketbolshy dopty saqınaǵa kıgizip jiberdi. Sıqyrǵa toly 3 sekýnd Keńestik quramany Olımpıada chempıony etti.