Jańbyr jaýady, keı jerlerde nóser bolady.
«Qazgıdromet» RMK sınoptıkteri shildege arnalǵan aýa raıy boljamyn usyndy, dep habarlaıdy Almaty-akshamy.kz.
Shildeniń birinshi onkúndiginde Qazaqstannyń basym bóliginde sıklondyq belsendilik jáne atmosferalyq fronttar áserinen turaqsyz aýa raıy saqtalady. Jańbyr jaýady, keı jerlerde nóser bolady: Qazaqstannyń batys oblystarynda aıdyń basynda, respýblıkanyń qalǵan bóliginde shildeniń birinshi onkúndiginiń ortasynda.
«Kún kúrkirep, jańbyr, burshaq jaýady, jel ekpini 15-25 m/s deıin kúsheıedi. Osy kezeńde Soltústik teńizder aımaǵynan sýyq aýa massalary yǵysyp, respýblıkanyń soltústik jartysynda túnde temperatýra fony +5+13 gradýs, kúndiz aýa temperatýrasy +18+28 gradýstan +12+17 gradýsqa deıin tómendeıdi, respýblıkanyń ońtústik jartysynda túnde +20+25 gradýstan +12+20 gradýsqa deıin, kúndiz +30+38 gradýstan +23+30 gradýsqa deıin aptap bolady», - delingen habarlamada.
Shildeniń birinshi onkúndiginiń aıaǵy men ekinshi onkúndiginiń basynda kún ysıdy. Aýa temperatýrasy kúndiz kóteriledi:
- respýblıkanyń ońtústik-batys jartysynda +30+40 gradýsqa deıin,
- soltústikte, ortalyqta jáne shyǵysta +25+33 gradýsqa deıin.
Aıdyń ortasynda Reseıdiń eýropalyq aýmaǵy aımaqtarynan keletin sýyq aýa massalary aýa temperatýrasynyń tómendeýine áser etedi. Respýblıkanyń basym bóliginde naızaǵaı oınap, jańbyr jaýady, ońtústik jáne batys oblystarynda qumdy daýyl turyp, jel kúsheıedi.
«Aıdyń ekinshi jartysynda aýa temperatýrasy turaqsyz bolady dep kútiledi: respýblıkanyń ońtústik jartysynda túnde +15+20 gradýstan +18+25 gradýsqa deıin, kúndiz +25+30 gradýstan +35+42 gradýsqa deıin, soltústik jartysynda túnde +10+15 gradýstan +15+20 gradýsqa deıin, kúndiz +20+28 gradýstan +28+35 gradýsqa deıin», - delingen habarlamada.