— Memleket basshysy Qasym-Jomart Kemeluly Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Qazaqstan halqyna Joldaýy – ýaqyttyń talabynan týǵan strategıalyq qujat. Ásirese, densaýlyq saqtaý salasynyń ókili retinde men Prezıdenttiń sıfrlyq transformasıaǵa basymdyq berýin erekshe qýanyshpen qabyldadym. Óıtkeni búgingi kúni sapaly medısına – ozyq tehnologıamen, jańa múmkindiktermen jáne jasandy ıntellektpen tikeleı baılanysty.
Joldaýda aıtylǵan «sıfrlyq teńsizdikti joıý» mindeti – qoǵam úshin ǵana emes, árbir dáriger úshin de asa mańyzdy. Biz naýqastyń jaı-kúıin jyldam anyqtaý, derttiń aldyn alý jáne emdeýdiń tıimdi joldaryn tabý úshin zamanaýı sıfrlyq sheshimderge muqtajbyz. Mysaly, jasandy ıntellekt medısınalyq derekterdi taldap, dıagnostıka sapasyn arttyrýǵa, ýaqyt únemdeýge jáne adamı faktordan týyndaıtyn qatelikterdi azaıtýǵa kómektesedi. Bul – medısınadaǵy jańa dáýirdiń bastamasy.
Prezıdentimizdiń «bilim men ǵylymdy tehnologıalyq serpilispen ushtastyrý» jónindegi tujyrymy da biz úshin baǵdarsham ispetti. Jańa býyn dárigerleri sıfrlyq saýatty, derekterdi taldaı biletin, tehnologıany ıgergen maman bolýy shart. Osy oraıda, jasandy ıntellekttiń múmkindikterin meńgerý – tek İT-mamandardyń emes, dárigerlerdiń de kúndelikti qajettiligine aınalmaq.
Elimizdiń aldaǵy damý baǵyty aıqyn: sıfrlyq tehnologıa – ulttyq básekege qabilettiliktiń negizgi faktory. Biz osy ózgeristerge beıimdelip qana qoımaı, ony medısınadaǵy adam ómirin saqtaý men densaýlyqty nyǵaıtý isinde tıimdi qoldanýǵa tıispiz.
Sondyqtan 36 emhana ujymy Memleket basshysynyń bastamalaryn tolyq qoldaıdy. Jasandy ıntellekt dáýirinde densaýlyq saqtaý salasy jańa beleske kóterilip, halyqtyń ómir sapasyn jaqsartýǵa bar kúsh-jigerimizdi jumsaýǵa daıynbyz.