Bıznesti qorǵaý jáne zańsyz aralasýǵa jedel den qoıý maqsatynda arnaıy mobıldi top quryldy
Shymkentte úsh jyl ishinde shaǵyn jáne orta bıznes sýbektileriniń qyzmetine laýazymdy tulǵalardyń zańsyz aralasýynyń 21 faktisi anyqtalyp, 20 laýazymdy tulǵa sottalǵan, dep habarlaıdy Almaty-akshamy.kz QazAqparatqa silteme jasap.
Bul týraly Qazaqstan Respýblıkasynyń Sybaılas jemqorlyqqa qarsy is-qımyl agenttiginiń Shymkent qalasy boıynsha departamenti basshysynyń birinshi orynbasary Jandos Jumabaev kásipkerlermen kezdesýinde aıtty.
Sondaı-aq, Shymkent qalasynyń Sybaılas jemqorlyqqa qarsy qyzmeti Kásipkerler palatasymen birlesip bıznesti qorǵaý jáne zańsyz aralasýǵa jedel den qoıý maqsatynda arnaıy mobıldi top qurdy. Toptyń quramyna qala ákiminiń orynbasary, aýdan ákimderi, antıkor qyzmetkerleri, kásipkerler palatasy, tabıǵı monopolıalardy retteý jáne básekelestikti qorǵaý departamentteriniń ókilderi, kásipkerler qaýymdastyǵy, zań keńesshileri men qoǵam belsendileri enip otyr.
Mobıldi top tegin aqparattyq-konsýltasıalyq qoldaý kórsetedi, ótinishter men shaǵymdardy, usynystar qabyldaıdy, kásipkerlik qyzmetke kedergi keltirgen jaǵdaılar týraly telefon habarlamalaryna shuǵyl jaýap beredi.