Júrek-qan tamyrlary aýrýlarynyń kózge anyq bilinbeıtin belgileri baryn bildińiz be? Bul týraly kardıolog Olıver Gýttman aıtyp berdi, - dep habarlaıdy Aqshamnews.kz tilshisi "Doktor Pıterge" silteme jasap.
Júrek-qan tamyrlary aýrýlary áli kúnge deıin ólim-jitimniń eń basty sebepteriniń biri bolyp tur. Sol sebepti der kezinde kardıologqa qaralý – ómirdi saqtap qalýy múmkin qadam.
Kardıolog Olıver Gýttman kınoda júregi aýyrǵan adamdy ádette dramaǵa toltyryp kórsetetinin aıtty: kenetten keýdesin qysyp ustaıdy, búgilip qulaıdy... Al shynaıy ómirde júrek syrqaty bulaı emes, basqasha belgi berýi múmkin.
Maman júregińizdi mindetti túrde teksertýge sebep bolatyn birneshe qaýipti belgilerdi atap ótti.
Qaýipti belgiler
Júrek aýyrýy árdaıym ótkir sezilmeıdi. Keıde ol tek anda-sanda paıda bolatyn qysym nemese keýdedegi qysylý sezimi túrinde bilinedi.
Asqazandaǵy qyjyl ne as qorytý buzylysyna uqsaıtyn belgilerdi de elemeýge bolmaıdy. Eger ol qol, moıyn, jaq nemese arqa aýyrsa, bul stenokardıanyń belgisi bolýy yqtımal.
Eger jattyǵýdan keıin jeńil entigý qalypty bolsa, qarapaıym áreketterden keıin de dem jetpeı qalý – qaýipti belgi.
«Mysaly, buryn baspaldaqpen ońaı kóteriletinsiz, al qazir qınalyp qalasyz. Nemese úı ishinde jaı ǵana júrip bara jatyp aýa jetpeıdi, tipti baýyńyzdy baılaý úshin eńkeıgende tynysyńyz tarylady», – deıdi dáriger.
Taǵy bir dabyl – tynymsyz sharshaý men álsizdik. Demalyp alsańyz da, kúshińiz qalmasa, ydys jýý, dúkenge barý sıaqty qarapaıym sharýalar da sharshatsa – dárigerge qaralǵan jón.
«Ásirese áıelderde qalyptan tys sharshaý júrek aýrýynyń eń erte belgileriniń biri bolýy múmkin. Kóbine ol keýde aýyrsynýynsyz baıqalady», – dep eskertedi maman.
Energıa azaıǵan saıyn zeıin qoıý da qıyndaıdy.
Júrek qaǵysynyń buzylystary
Jıi kezdesetin taǵy bir belgi – júrek qaǵysynyń buzylýy.
«Keýdede dúrsil estilmeı qalýy nemese esh sebepsiz qatty soǵa bastaýy da nazar aýdarýdy qajet etedi. Mundaı qubylys tynyshtyq kúıinde de baıqalýy múmkin», – deıdi dáriger.
Sondaı-aq júregińiz «qaltyrap», «toqtap qalǵandaı» sezilse, bul da tekserilýge sebep.
Taǵy elemeýge bolmaıtyn belgiler:
-
otyrǵan kúıde tereń tynys ala almaý;
-
túnde tunshyǵý ustamalary;
-
yńǵaıly uıyqtaý úshin qosymsha jastyq qajet bolýy;
-
túshkirý men jóteldiń joǵarydaǵy belgilermen qatar júrýi.