Qazaqstandyq belgili sportshy Jibek Qulymbetova Tashkentte kúrespesten grepplıngten Azıa chempıony atandy, dep habarlaıdy Almaty-akshamy.kz
J.Qulymbetovanyń ózi ınstagramdaǵy paraqshasynda jazǵandaı, bul birinshilikte oǵan qarsylas buıyrmaǵan.
«Mundaı qyzyq jaǵdaı meniń sporttyq tájirıbemde alǵashqy ret bolyp otyr.Tashkentte ótken jarysta kúrespeı-aq grepplıng kúresinen Azıa chempıony atandym. Barlyq sportshylardyń qarsylastary kóp boldy! Tartysty kúrester kórdim! Biraq osy joly maǵan qarsylas buıyrmady. Dýbaıdaǵy jarystan keıin elge oralyp, kishigirim demalys alamyn dep oılaǵan edim. Alaıda meni taǵy bir úlken jarys kútip turdy. Jarysqa 16-17 jas aralyǵyndaǵy topqa 48 kg salmaq dárejesi boıynsha tirkeldim. Eki qarsylasym bar edi, nege ekeni belgisiz, olar aıaq asty jarysqa qatysýdan bas tartty. Biraq, sonaý jerden kelgen soń bos ketpeıin, eresekter arasynda kúresip, baq synap kóreıin dep sheshim qabyldadym. Eresekter arasynda meniń 4 qarsylasym bolǵan edi. Biraq, olar da sanaýly ýaqyttar qalǵanda, basqa salmaq dárejesine aýysyp, taǵy da qarsylassyz qaldym. Sóıtip, kúrespeı-aq Tashkent qalasynda ótip jatqan grepplıng AIGA kúresinen Azıa chempıonatynda eresekter arasynda Azıa chempıony atandym. Kúresemin dep nastroı ustap, kúrese almaı qalý birtúrli sezim eken. Osylaı da jeńiske jetýge bolady eken ǵoı . Quttyqtap qoısańyzdar bolady», – dep jazdy ol Instagram paraqshasynda.
16 jastaǵy Jibek Qulymbetova Dýbaıda ótken AJP Tour Asia Continental Jiu-jitsu Championship 2023 - Professional jarysynda birden eki altyn medal jeńip aldy.
Azıa chempıonatyna Jibekten basqa birneshe qazaqstandyq sportshylar da qatysty. Olardyń barlyǵy Almaty oblysynan Saǵadat Nurmaǵambetov atyndaǵy sport klýbynyń atynan barǵan. Barlyǵy 16 altyn, 9 kúmis, 10 qola medal jeńip alǵan. Sportshylardyń arasynda UWW grepplıng boıynsha álem chempıony Samat Aıtpanbet te bar.
Tashkente ótken grepplıng kúresinen Azıa chempıonatynda shákirtterim el namysyn qorǵap, kók týymyzdy bıikke kóterdi. 16 altyn, 9 kúmis, 10 qola medaldy jeńip alyp, elge qaraı jolǵa shyqty. Sózben emes, ispen dáleldeıtin, eńbek etip, elge qyzmet etetin, kók týymyzdy bıikke kóteretin osyndaı rýhy bıik jastarymyz kóp bolsyn! Aldaǵy ýaqytta baıraqty básekelerde boı kórsetip, jarys jeńimpazy bolamyz degen senimdemiz,– deıdi S.Q. Nurmaǵambetov atyndaǵy «Sagadat Batyr - QTT» sport klýbynyń negizin qalaýshy, bas bapker Nursultan Orynbasarov.