Jarqyn jaz demalysqa da, qurylysqa da yńǵaıly mezgil ǵoı. Tipti, týǵan jerimizge de, alystaǵy aǵaıynǵa da kóbine osy mezgilde at basyn buramyz. Jyl boıǵy eń kúrdeli degen istiń ózin osy jazǵa qaldyramyz. Tipti, jazǵy demalysty ótkizýdiń ózi úlken máseledeı kórinedi. Sondyqtan «siz jazda qaıda demalasyz?» degen saýaldy ortaǵa saldyq.
Asyly OSMAN, qoǵam qaıratkeri: Bir serpilip, sergip qaldym
Men jazǵy demalysymdy bastap ta kettim. Qazir qala syrtyndaǵy shıpajaıda demalyp jatyrmyn. Taza aýamen tynystap, em qabyldap jatqan jáıim bar. Meıirimdi meıirbıkeler, saýsaǵynyń ózi sıqyrly dáriger baýyrlarym jan-jaǵymnan «apaılap» jany qalmaı jatyr. Adamǵa osynyń ózi jaqsy demalys emes pe? Bir serpilip, sergip qaldym. Jalpy, men burynnan-aq alysqa ketip, demalys izdegen kisi emespin. Maǵan halyqtyń arasynda bolyp, sheshilip áńgime qurǵan unaıdy. Sosyn jasy kelgen adam týǵan jerin ańsap turady eken. Men de bıyl el jaqqa baryp qaıtsam ba dep edim. Onyń sáti túspeıtin syńaıly. Kún degeniń erekshe ysyp ketti. Onyń ústine ońtústiktiń jazy budan da zor, eki ese ystyq. Ári úlken kisige alysqa jol júrý de ońaı emes eken. Sondyqtan bıylǵy jazdy Almatyda ótkizetin syńaılymyn.
Maıra İLIASOVA, Qazaqstannyń eńbek sińirgen ártisi: Alakóldiń shıpaly sýyna shomylamyn
Negizi, jazda bir demalyp alǵan durys qoı. Qysta josparlaǵan jumystarym óte kóp bolyp tur. Sol sharýalardy bitirip tastaıyn dep shapqylap júrgen jaıym bar. Sátin salsa, nemerelerimdi alyp, Alakólge demalyp qaıtsaq pa dep otyrmyz. Syrtqa, shetelge ketý degen jospar joq. Men úshin Alakóldiń shıpaly sýyna shomylǵannan artyq demalys joq. Balalar da osy bastan óz elimizde demalǵandy úırensin dep, ádeıi ózim bastap barǵaly otyrmyn. Bıylǵy biraz óner sapary da osy mezgilmen tuspa-tus kelip tur.
Mereke SMAILOVA, prodúser, «Mereke» ortalyǵynyń jetekshisi: Úlken baıqaýǵa ázirlik ústindemiz
Qazir biz úlken baıqaýǵa ázirlik ústindemiz. Eki aptadan keıin Londonǵa ushqaly otyrmyz. Ónerpaz balalardyń úlken Halyqaralyq án baıqaýyna qatyspaqshymyz. Shetelge shyqty degen aty bolmasa, bul da daıyndyq, eńbekti talap etedi. Shyny kerek, ishteı qatty qobaljyp júrmin. Sátin salyp, bári oıdaǵydaı bolsa, Alakólge baryp demalamyz dep josparlap otyrmyz.
Aınur ÁLİPBAEVA, jeke kásipker: Bir sátke de ýaqyt joq
Qysta oılaýshy edim, «osydan jaz shyqsa, anda baram, mynda baram» dep. Qaıdaǵy... qazirdiń ózinde jazdyń bir aıy ótip barady. Jaz – naǵyz saýdanyń qyzatyn ýaqyty ǵoı. Sondyqtan bir sátke de ýaqyt joq. Onyń ústine saýda ornymyzdyń kólemin ulǵaıtamyz dep, qurylysty da bastap qoıdyq. Osy ǵımaratty salyp bolsaq, óz ónimimizdi óndiretin bolamyz. Qazirdiń ózinde bizdiń kásiporyn shyǵaryp jatqan ónimderge suranys joǵary. Múmkin kúzde, kún salqyndaǵanda demalatyn bolarmyz.
Gúlnar JUMABAIQYZY, jýrnalıs: «Saryaǵashtaǵy» shıpajaıǵa baramyn
Bizdiń bıylǵy jazǵy demalysymyz qyzý qarqynmen bastaldy. «Qazaqtyń toıy bitpesin» demekshi, batystaǵy qaıyn jurtta júrmiz. Osyndaǵy týmalardyń toılary bolyp, qýanyshtaryna ortaqtasyp jatqan jaıymyz bar. Sosyn ońtústikke qaraı oıysamyz. Tórkinde de biraz qýanyshtar kútip tur. Jylda «Saryaǵashtaǵy» shıpajaıda bir mezgil demalyp qaıtamyn. Bıyl da jazǵy demalysymnyń bir-eki aptasyn osynda ótkizýdi josparlap otyrmyn.