2025 jylǵa qaraı tutynýshylardyń quqyqtaryn qorǵaýdyń tıimdiligin 74,7%-ǵa deıin arttyrý mindeti tur.
Saýda jáne ıntegrasıa mınıstrliginiń keńeıtilgen alqa otyrysynda vedomstvo basshysy Serik Jumanǵarın byltyr tutynýshylar tarapynan 30 myńnan astam ótinish túskenin aıtty, dep habarlaıdy Almaty-akshamy.kz QazAqparatqa silteme jasap.
«Ótken jyldyń qorytyndysy boıynsha, tutynýshylardyń 30 myńnan astam ótinishi qaraldy. Bul – 2021 jylmen salystyrǵanda 20 paıyzǵa artyq. Tutynýshylarǵa shamamen 800 mln teńge qaıtaryldy. Tutynýshylardyń ótinishterin qabyldaý jáne qarastyrý prosesin avtomattandyrý úshin e-Tutynushy salalyq aqparattyq júıesi e-Otinish-pen biriktirilgen», - dep atqarylǵan jumystardyń qorytyndysyna toqtaldy mınıstr.
Onyń aıtýynsha, tutynýshylardyń quqyǵyn qorǵaý baǵytyndaǵy zańnamalyq túzetýlerdiń ekinshi paketi ázirlengen.
«Zańnamalyq túzetýlerdiń negizgi basymdyqtarynyń qataryna ombýdsmen ınstıtýtyn engizý, bıznes qyzmetteriniń barlyq salalaryna bazalyq qaǵıdattardy taratý jáne elektrondyq saýdadaǵy retteý máseleleri kiredi. Maýsym aıynda zań jobasyn Parlamentke engizýdi josparlap otyrmyz. Jalpy, 2025 jylǵa qaraı tutynýshylardyń quqyqtaryn qorǵaýdyń tıimdiligin 74,7%-ǵa deıin arttyrý mindeti tur», - dep túıindedi Serik Jumanǵarın.