Qazaqstan úkimeti salyqtan jaltarýǵa qarsy kúresti kúsheıtýdi kózdep otyr. Bul týraly Ulttyq ekonomıka mınıstrliginiń Salyq jáne keden saıasaty departamentiniń dırektory Erlan Saǵnaev málimdedi, dep habarlaıdy Aqshamnews.kz. Onyń aıtýynsha, ásirese salyqty bólshekteý arqyly mindettemelerden jaltarý – el búdjetin mıllıardtaǵan teńgeden aıyryp, áleýmettik ınfraqurylymnyń damýyna kedergi keltirýde.
Erlan Saǵnaev salyq tóleýden jaltarý áreketterin qoǵam aldyndaǵy jaýapkershilikten qashý dep baǵalaıdy. Onyń aıtýynsha, mundaı qadamdar búdjetke túsetin kiristi azaıtyp, onyń saldarynan jańa mektepter, aýrýhanalar men joldar salýǵa qajetti qarajat jetpeıdi.
«Kóleńkeli sqemalardy qoldanǵan kásipkerler salyqtan jaltaryp, memleketti emes, óz qaltalaryn ǵana oılaıdy. Olar shyn máninde qarapaıym halyqtyń múmkindigin urlap otyr. Bul – sapaly bilim men medısınadan aıyrý degen sóz», – dedi Saǵnaev.
Qurylys salasyndaǵy kóleńkeli ekonomıka – basty nazarda
Saǵnaevtyń aıtýynsha, qurylys salasy – salyqtan jaltarý jıi tirkeletin baǵyttardyń biri. Buǵan deıin salaǵa berilgen qosylǵan qun salyǵynan (QQS) bosatý jeńildikterine qaramastan, turǵyn úı baǵasy 21 esege deıin qymbattaǵan.
«Salyqtyq jeńildikter joıylǵan jaǵdaıda, qurylys salasynan búdjetke keminde 130 mlrd teńge qosymsha túsim túser edi. Bul qarjyǵa kemi 40 jańa mektep salýǵa bolady», – dedi ol.
Salyq tóleý – áleýmettik jaýapkershilik
Qazaqstanda salyq tóleý tek zań aldyndaǵy mindet emes, azamattyq jaýapkershilik retinde qarastyryla bastady. Bul – damyǵan elderde qalyptasqan salyq mádenıetiniń negizi.
Memleket bıznes úshin ashyq ári zańdy jumys isteýge barlyq jaǵdaı jasap otyr. Endi kásipkerlerden kóleńkeli sqemalardan bas tartý talap etiledi.
«Memleket zańdy bıznes júrgizýge múmkindik beredi. Biraq resýrstardy ádil bólý men turaqty ekonomıkalyq ósim úshin kóleńkeli ekonomıkadan tolyq bas tartý qajet», – deıdi Saǵnaev.
Baqylaý kúsheıtiledi
Aldaǵy ýaqytta salyqtan jaltarý faktilerin anyqtaý men aldyn alý sharalary kúsheıtiledi. Bul ádil básekelestik ornatyp, búdjetti áleýmettik salaǵa tıimdi baǵyttaýǵa múmkindik beredi.
Salyqtan jaltarý – eldiń áleýmettik damýyna tikeleı kedergi. Búdjetke túspegen árbir teńge – salynbaǵan mektep, qural-jabdyqsyz aýrýhana nemese jóndelmegen jol. Sondyqtan ashyq ekonomıka qurý men salyq mádenıetin qalyptastyrý – memleket qana emes, árbir azamat pen kásipker úshin ortaq mindet.