Sálden keıin «Qazaqstan» teleradıokorporasıasynyń uıymdastyrýymen «Saılaý-2023» onlaın marafony bastalady.
Aýqymdy shara telearnalar men aqparat agenttikteriniń saıttarynda, Facebook jáne You Tube jelisindegi resmı paraqshalarynda 16 saǵat boıy úzdiksiz kórsetiledi, dep habarlaıdy Almaty-akshamy.kz Qazaqstan.tv saıtyna silteme jasap.
"Qazmedıa" ortalyǵynyń kınokonsert zalynda ótetin marafonǵa kelem deýshilerge esik ashyq.
Marafonǵa aqparat quraldarynyń ókilderi, depýtattar, saıasattanýshylar, mınıstrler, túrli sala qyzmetkerleri, qoǵam belsendileri men óner juldyzdary qatysady dep josparlanǵan. Al qazir marafondy uıymdastyrýshylar ázirlikti pysyqtap jatyr.
Al brıfıń alańynda saılaýshylardyń saıası belsendiligi boıynsha ár saǵattyń basynda jedel baspasóz konferensıalary uıymdastyrylyp, halyqaralyq baıqaýshylar, Bas prokýratýra, İshki ister mınıstrliginiń ókilderi daýys berý barysyna qatysty aqparat beredi.
Tok-shoý formatynda túrli saıası-qoǵamdyq taqyryptarda dıskýssıa ótedi. Al osy jolǵy onlaın-marafonnyń ereksheligi - debat alańy. Qatysýshylar jasandy ıntellekt, bala tárbıesi, ınternet kontentti baqylaý, memlekettik tapsyryspen kitap shyǵarý máseleleri, aýyldardy damytý, álemdik mıgrasıa, medısınalyq saqtandyrý taqyryptary boıynsha óz pozısıasyn qorǵaıdy.
Sondaı-aq, marafon qonaqtary saıası naýqan jaıyndaǵy azamattyq pikirin ekspress-kamera arqyly bildire alady. Al túngi 00:00-de marafon alańynda daýys berýdiń aldyn ala nátıjeleri boıynsha Exit-poll qorytyndysy jarıalanady.