Elimizdiń birinshi raketkasy, Ýımbldon-2022 chempıony Elena Rybakına "Jyl oıynshysy" atalymy boıynsha úmitkerler qataryna kirdi. Bul týraly Almaty-akshamy.kz Inbusiness.kz-ke silteme jasap habarlaıdy.
Joǵary marapatqa álemniń birinshi raketkasy, "Rolan Garros", US Open jáne taǵy alty jarystyń jeńimpazy, Polsha ókili Iga Shventek, dúnıejúzilik reıtıńide ekinshi turǵan US Open jáne Ýımbldon fınalısi, Madrıd pen Berlın chempıony, týnıstik Ons Jaber talaspaq. Budan bólek, amerıkalyqtar, álemniń jetinshi raketkasy, Rolan Garros fınalısi Korı Gaýff, reıtıńide úzdik úshtiktegi Gvadalahara chempıony Djessıka Pegýla, sonymen qatar bıyl WTA qorytyndy týrnırinde top jarǵan fransıalyq Karolın Garsıa tizimge ilikken.
Bıyl tamasha nátıjege qol jetkizgen Qazaqstannyń birinshi raketkasy Elena Rybakına otandastarynyń qoldaýyn únemi sezinetinin aıtyp, QTF baspasóz qyzmetine suhbat berdi.
- 2022 jyl aıaqtalyp keledi. Bul jyl óziń úshin tabysty boldy ǵoı, Elena, solaı ma?
- Iá, tutastaı alǵandaı, sátti boldy. Ásirese, Ýımbldondaǵy jeńisim talaılar armandaıtyn tıtýl ekendigi anyq. Komandalyq jarysty alsaq, bizdiń ulttyq qurama alǵash ret álem chempıonaty – Bıllı Djın Kıng kýboginiń fınaldyq kezeńinde óner kórsetti. Bul – biz úshin úlken tájirıbe, keleside budan da jaqsy oınaımyz dep úmittenemin.
- Bıyl Ýımbldonda jeńiske jettiń. "Úlken dýlyǵa" týrnırindegi jeńisten keıin ómirińde ne ózgeris boldy?
- Eldiń nazaryna iligip, mindet pen jaýapkershilik júgi aýyrlaı tústi. Árıne, bul jeńistiń tyń serpilis bergeni anyq. Degenmen túbegeıli ózgeris boldy dep aıta almaımyn.
- Elena, ótken jyly Tokıo Olımpıadasynda sátti oınap, jartylaı fınalǵa deıin jettiń. Sen úshin "Úlken dýlyǵa" jarysyndaǵy jeńis pe álde Olımpıada oıyndarynyń "altyny" mańyzdy ma?
- Bul kúrdeli suraq eken. Sóz joq, Olımpıadada da, "Úlken dýlyǵa" dodasynda da jeńiske jetkim keledi. Olımpıada oıyndarynan keıin barlyq qazaqstandyq jankúıerlerdiń orasan zor qoldaýyn sezindim. Ýımbldonnan keıin de solaı boldy. Áleýmettik jeli men messendjerlerde kóptegen tilekter jazyldy. Bul maǵan kúsh beredi, qaı týrnır bolmasyn, jeńiske jetkim keledi (kúldi).
- Ulybrıtanıa ashyq chempıonatynan keıin mol tabys taptyń. Osyǵan baılanysty qaryz surap nemese kómek kórsetýdi ótingen adamdar kóbeıdi me?
- Iá, járdem suraıtyndar bar, múmkindigime qaraı qol ushyn berýge tyrysamyn.
- Qazaqstannyń namysyn abyroımen qorǵap kelesiń. Jankúıerleriń úshin qazaq tilinde úsh sóz aıtshy?
- Sálem, rahmet jáne alǵa!
- Áıelder arasyndaǵy jarystarda álemniń mańdaıaldy tenısshilerimen synǵa tústiń. Birazyn jeńdiń. Eger jigittermen oınaýǵa múmkindik bolsa, kimdi tańdar ediń?
- Maǵan Rodjer Federerdiń oıyny unaıdy. Onymen kortqa shyqqym keledi. Ókinishke qaraı, ol kásibı mansabyn aıaqtady. Múmkin, aldaǵy ýaqytta kezdesip, sheberlik baıqasyp qalarmyn.
- Ýımbldonda erler arasynda Novak Djokovıch jeńiske jetti. Ol – "Úlken dýlyǵa" týrnırlerin 21 ret utqan oıynshy. Osyndaı ataqty tenısshimen qatar alǵashqy tıtýlǵa ıe bolý sen úshin qanshalyqty mańyzdy?
- Iá, álemdegi eń baıyrǵy da bedeldi jarysta Novakpen birge jeńis tuǵyrynda turý – men úshin úlken qurmet. Marapat tapsyrylǵan saltanatty rásimde onymen qatar turyp, azdap áńgimelesýdiń sáti tústi. Tolqydym ári erekshe qýanysh qushaǵynda boldym.
- Kásibı oıynshy bolǵandyqtan, únemi jol ústinde júresiń, sondyqtan Qazaqstanǵa kelýiń de sırek. Bos ýaqyt bolyp, elge kelgende, qaı qalada bolasyń, qaı jerler kóbirek unaıdy?
- Astanada jıirek bolamyn. Almatyǵa da jol túsip júr. Astanalyqtar ókpelemes, ázirge Almaty unaıdy (kúldi).
- Suhbat sońynda óz jankúıerlerińe ne aıtar ediń?
- Jeńis kezinde ǵana emes, utylyp qalǵan sátte de meni qoldaıtyndardyń bárine rıasyz alǵys aıtqym keledi. Men árqashan sizderdiń qoldaýlaryńyzdy sezinemin. Budan bylaı da solaı bolady dep úmittenemin. Kelesi jyly kezdeskenshe! Alǵa, Qazaqstan!