Almaty qalasy boıynsha QR prezıdenti saılaýynan habar taratý jónindegi baspasóz ortalyǵy alańynda «Qoǵamdyq pikir» qoǵamdyq qory ókilderi - Independ.kz aqparattyq portalynyń ıesi Rafael Gasanov, HBK korporatıvtik jáne áleýmettik damý jónindegi prorektory Dıana Malaeva jáne jýrnalıs, bloger Maqsat Mamadıarovtyń qatysýymen saılaýdy baqylaý jóninde baspasóz máslıhaty ótti, dep habarlaıdy Almaty-akshamy.kz.
«Biz tańǵy 6-dan bastap jumys istep jatyrmyz, 531 ýchaskeni qamtydyq. Bıylǵy saılaýdy baqylaýǵa qatysyp, belsendilik tanytyp jatqan jastar óte kóp», - dedi Rafael Gasanov.
Ol osy saǵatqa deıin «Qoǵamdyq pikir» qoǵamdyq qory baqylaýshylarynyń málimeti boıynsha eshqandaı zań buzýshylyq tirkelmegenin aıtty. Suraqtar týyndaǵan jaǵdaıda baqylaýshylar dereý uıymnyń shtab-páterine baıandaıdy.
Daýys berýge kelip jatqan saılaýshylarǵa qatysty Dıana Malaeva almatylyqtardyń demalys kúni túske deıin uıyqtaǵandy jaqsy kóretinin aıtty. Biraq túske qaraı olardyń sany arta bastady.
«Kúnniń birinshi jartysy ótti. Baqylaýshylar jaqsy daıyndalǵan. Suraqtar kelip jatyr, olarǵa jergilikti baqylaýshylar tushymdy jaýap bere alady», — dedi Dıana Malaeva.
Rafael Gasanovtyń aıtýynsha, saılaý ýchaskelerinde jıi kezdesetin máselelerdiń biri turaqty tirkelgen orny boıynsha tirkeýden shyǵý týraly talon almaǵan kúıi Almatydaǵy saılaý ýchaskesine kelgen adamdarǵa qatysty.
«Árıne, ártúrli jaǵdaılar bar jáne olardyń árqaısysyn jeke qarastyrý kerek. Kez kelgen adam túsinbegen nársesin saılaý ýchaskesine baryp bile alady, sol jerde oǵan barlyǵyn túsindirip beredi», - dedi spıker.
Sondaı-aq ol kóshi-qonnyń óte joǵary ekenin, Almatyda tirkelmeı júrgenderdiń kóp ekenin basa aıtty. Rafael Gasanov keshki baspasóz máslıhatynda esepten shyǵarý kýálikterine qatysty qansha jaǵdaı tirkelgenin jarıalaýǵa ýáde berdi.
«Saılaýshylardyń ishinde daýys berýge orta jáne egde jastaǵy adamdar kóbirek keledi», - dedi R.Gasanov.
Dıana Malaeva daýys berýge alǵashqy bolyp egde jastaǵy adamdardyń, al jastardyń, otbasylyq juptardyń saǵat 11-12-den keıin keletinin aıtty.