Almaty qalasyna Rázan oblysynan delegasıa keldi. Oblys gýbernatory N.V.Lúbımov pen «RSO» AQ bas dırektory V.O.Nıkıshına bastaǵan delegasıa qaladaǵy Rázan kásipornynyń ártaraptandyrylǵan kórme zalynda tanystyrý jumystaryn júrgizdi. Gýbernatordyń Almatyǵa issapary saýda-sattyqty nyǵaıtýǵa baǵyttalǵan. Reseı Federasıasy men Qazaqstan Respýblıkasy arasyndaǵy ózara ekonomıkalyq seriktestik ornatýǵa negizdelgen sharada Rázan kásiporyndarynyń ekspozısıalyq ónimderi nazarǵa usynyldy. Sondaı-aq, basqosýda jumys barysy týraly kelissózder oryn aldy.
– Biz Rázan kásiporyndarynyń ónimderin usyný úshin arnaıy ashylǵan kórme zalynda shara ótkizdik. Sharanyń basty maqsaty – ónimderdi qazaqstandyq tutynýshylarǵa prezentasıa túrinde tanystyrý. Sonymen qatar, qazaqstandyq seriktester taýyp, olarmen senimdi kelissózder júrgizip, uzaq ýaqytqa kelisim-shart jasaý maqsatynda jumys isteımiz. Bolashaqta Ózbekstan elinde dál osyndaı fılıal ashý oıymyzda bar. Qazir osy maqsatta jumys istep jatyrmyz. Qazaqstan bizdiń kóptegen elderdegi seriktesterimizdiń ishinde eń mańyzdysy. Ol TMD elderiniń ishindegi seriktesterimizdiń arasynda 2-oryn ıelenedi. Birinshi orynda Belarýs eli ornalasqan. Sondaı-aq, biz tek eksportpen emes, ımportpen de aınalysamyz. Mysaly, Qazaqstan ónimderiniń 3-4%-yn ımporttap, al Rázan kásiporyndary ónimderiniń 94%-yn eksporttaımyz. Eki el arasynda bızneske qaraǵanda, dostyq qarym-qatynas joǵary deýge bolady, – dedi N.Lúbımov.
– Reseı saraptama ortalyǵynyń tájirıbesi boıynsha ártúrli memleketterde ornalasqan dál osyndaı 3 fılıalymyz bar. Pandemıa ýaqytynda ónimderdi eksporttaý máselesi qarqyn alǵany belgili. Alaıda, Rázan oblysyndaǵy áriptesterimizdiń yntasy Qazaqstanda Rázan ónimderin eksporttaý boıynsha óte belsendi pozısıany ustandy. Sondyqtan oryn alyp jatqan shara óte mańyzdy dep oılaımyn. Onlaın tapsyrys bermeı, ónimderdiń sapasyn kózben kórip, ustap, tekserý tutynýshylar úshin mańyzdy. Bizdiń qaýymdastyq tutynýshylarǵa osyndaı múmkindikter syılaıdy, – dedi O.Nıkıshına.
Rázan kásiporyndarynyń ónimderi Qazaqstannan bólek, Germanıaǵa (13,6%), Qytaıǵa (12,5%), Belarýs eline (11,1%), AQSH-qa (4,6%), Polshaǵa (4,6%), Ýkraınaǵa (3,8%) eksporttalady. Aldaǵy ýaqytta Ózbekstan, Afrıka elderine jol tartpaq. Shara sońynda eki el arasynda senimdi saýda-sattyq ornap, qarym-qatynas dostyqqa ulasady degen senim artyldy