Ulttyq áskerı-patrıottyq ortalyqta «Bas redaktorlar klýby» qoǵamdyq birlestigi men Qazaqstan Respýblıkasynyń Qorǵanys mınıstrligi arasynda yntymaqtastyq týraly memorandýmǵa qol qoıý rásimi ótti. Qujat medıa qaýymdastyq pen memlekettik sektor arasyndaǵy ornyqty seriktestikti qalyptastyrýǵa, sondaı-aq áskerı taqyrypty kásibı ári jaýapty túrde jarıalaýdy damytýǵa baǵyttalǵan.
Memorandýmǵa Bas redaktorlar klýbynyń prezıdenti, Qazaqstan Respýblıkasy Parlamenti Senatynyń depýtaty Bıbigúl Jeksenbaı jáne Qorǵanys mınıstriniń tárbıe jáne ıdeologıalyq jumys jónindegi orynbasary, vıse-admıral Serik Býrambaev qol qoıdy.
Talqylaýǵa Bas redaktorlar klýbynyń músheleri - jetekshi respýblıkalyq jáne óńirlik buqaralyq aqparat quraldarynyń basshylary, sondaı-aq Qorǵanys mınıstrliginiń aqparat jáne komýnıkasıalar, tárbıe jáne ıdeologıalyq jumys, uıymdastyrý-mobılızasıalyq baǵyt, áskerı bilim jáne ǵylym salalaryna jaýapty qurylymdyq bólimsheleriniń ókilderi qatysty. El óńirlerindegi bas redaktorlar kezdesýge onlaın formatta qosyldy.
Kezdesý barysynda Bıbigúl Jeksenbaı memorandýmǵa qol qoıý memlekettik organ men medıa qaýymdastyq arasyndaǵy senimdi nyǵaıtýǵa baǵyttalǵan sanaly qadam ekenin atap ótti:
«Prezıdent birneshe ret atap ótkendeı, bıliktiń ashyqtyǵy men qoǵammen adal dıalog - ornyqty memlekettiń negizi. Osy turǵyda kásibı medıa qaýymdastyqtyń róli aıryqsha. Aqparattyq keńistikte jaýapkershilik, dáldik pen mazmun standarttaryn aıqyndaıtyn - bas redaktorlar».
Bas redaktorlar klýbynyń prezıdentiniń aıtýynsha, ózara is-qımyldyń jańa formaty jekelegen baılanystardan júıeli jumysqa, al keıingi reaksıadan - aldyn ala oılastyrylǵan, mazmundy dıalogqa kóshýge múmkindik beredi.
Óz kezeginde vıse-admıral Serik Býrambaev qoǵamda Qarýly kúshterge qatysty qalyptasqan keıbir stereotıpterdiń áli de saqtalyp otyrǵanyna nazar aýdaryp, armıa, áskerı qyzmetshiler jáne olardyń elge qyzmeti týraly sapaly ári suranysqa ıe kontent qalyptastyrýdyń zor áleýeti bar ekenin atap ótti:
«Búginde ar-namys, borysh, otansúıgishtik sekildi negizgi qundylyqtardy qoǵamdyq dıskýrsqa qaıta engizý asa mańyzdy. Bul memleket pen medıa qaýymdastyqtyń birlesken kúsh-jigerin, Qarýly kúshterdiń qyzmetin faktilerdi burmalamaı, bezendirmeı, adal ári kásibı túrde jarıalaýdy talap etedi» — dedi vıse-admıral.
Qol qoıylǵan memorandým Qorǵanys mınıstrliginiń qyzmetkerlerine arnalǵan oqytý baǵdarlamalaryn iske asyrýdy, semınarlar, sheberlik sabaqtary, taǵylymdamalar men baspasóz týrlaryn ótkizýdi kózdeıdi. Sondaı-aq áskerı taqyrypty BAQ-ta jarıalaýdy jetildirý jónindegi usynymdardy ázirleý, Bas redaktorlar klýbynyń saraptamalyq keńesin qalyptastyrý jáne onyń salalyq medıa jobalarǵa, onyń ishinde «Ásker medıa» konkýrsyna qatysýy josparlanǵan.
Kezdesý barysynda medıa qaýymdastyq ókilderi yntymaqtastyqty damytý jónindegi usynystaryn bildirdi. Óz bastamalaryn MNU ýnıversıtetiniń Halyqaralyq jýrnalısıka mektebiniń atynan medıamenedjer Baqyt Shoıynbek usyndy.
«Qazaq gazetteri» JSHS bas dırektorynyń orynbasary Qambar Ahmetov: «Bizdiń basylymdar Qazaqstan Respýblıkasynyń Qarýly kúshterimen uzaq jyldar boıy tyǵyz yntymaqtastyqta jumys istep keledi. Memorandým júıeli jumysty jolǵa qoıýǵa jáne zamanaýı aqparattyq formattardy engizýge negiz qalaıdy» - dep atap ótti.
«Lıter» gazetiniń bas redaktory Janna Oıshybaeva:
«Biz úshin armıa týraly kásibı ári aýdıtorıaǵa túsinikti tilde aıtý mańyzdy. Memorandýmǵa qol qoıý ashyq dıalogqa jańa múmkindikter ashady»- dedi.
Kezdesý qatysýshylary «Egemen Qazaqstan», «Kazahstanskaıa pravda» jáne «Lıter» basylymdary Qazaqstan Respýblıkasynyń Qarýly kúshterimen kóp jyldan beri yntymaqtastyq ornatyp kele jatqanyn atap ótip, aqparattyq ózara is-qımyldyń jańa formattaryn damytýǵa daıyn ekendikterin bildirdi.
Óńirlik buqaralyq aqparat quraldarynyń bas redaktorlary da memorandým aıasynda belsendi ári syndarly yntymaqtastyqqa daıyn ekenin rastady.