Qylmys: Almaty turǵyny Reseıden kólik urlaǵan
Reseı Federasıasynyń Novosibir qalasynan Toyota Camry markaly avtokólik urlanǵany týraly aqparat Pavlodar oblysynyń polısıasyna kelip túsken, dep habarlaıdy almaty-akshamy.kz QR İshki ister mınıstrliginiń baspasóz qyzmetine silteme jasap.
Habarlamany alǵannan keıin jedel túrde atalǵan avtomashınanyń Qazaqstan shekarasynan ótip, Pavlodar – Nur-Sultan tas jolymen júrgeni anyqtalǵan.
«Baǵdar dereý osy avtojol ýchaskesinde jol qaýipsizdigin júzege asyratyn patrúldik polısıa rotasynyń barlyq beketterine taratyldy. Biraz ýaqyttan keıin atalǵan avtokólik Ekibastuz aýyldyq aımaǵynyń Baıet aýyly mańyndaǵy Shiderti kenti baǵytyndaǵy tas jolda tirkeldi. Júrgizýshi polısıa qyzmetkerleriniń talabyna toqtamady», – dedi Pavlodar oblysy polısıa departamenti bastyǵynyń birinshi orynbasary Jasqaırat Qaıyrov.
Toyota Camry markaly avtokóligi Shiderti kentiniń janarmaı quıý stansıasynda ustaldy. Salonda bolǵan júrgizýshiniń Almaty qalasynyń 30 jastaǵy turǵyny ekeni belgili boldy. Er adamnyń qujattary bolmaı shyqqan. Polısıa jol erejesin buzǵany úshin júrgizýshige qatysty birqatar ákimshilik materıaldar qozǵalǵanyn atap ótti.
Avtokólik aıyp turaǵyna qamaldy. Shekara mańyndaǵy yntymaqtastyq sheńberinde ustaý týraly aqparat izdestirý bastamashysyna habarlandy. Avtokólik pen materıaldar Reseı Federasıasy İİM áriptesterine beriletin bolady.