Áýe reısine keshikken jolaýshy polısıaǵa ushaqta jarylǵysh zat bar dep habarlasyp, keıin ázil ekendigin aıtqan. Atalǵan azamat ustalyp, ýaqytsha ustaý ızolátoryna qamaldy, dep habarlaıdy Almaty-akshamy.kz Inform.kz-ke silteme jasap.
«1 qazan kúni túski ýaqytta «102» operatoryna belgisiz er adamnan «Astana – Taldyqorǵan» baǵytyndaǵy ushaqta jarylǵysh zat jasyrylǵany týraly habarlama keldi. Biraz ýaqyttan keıin ol qaıta qońyraý shalyp, bul ázil ekendigin aıtqan. Habarlamadan keıin jedel qyzmet shuǵyl oqıǵa ornyna jetti», - delingen habarlamada.
Resmı aqparatta aıtylǵandaı, kólik polısıasynyń qyzmetkerleri 37 jastaǵy er adamdy ustaǵan jáne ol kinásin moıyndaǵan.
«Qońyraý shalǵan azamattyń Taldyqorǵan qalasyna ushpaq bolǵandyǵy anyqtaldy. Alaıda reıske keshigip, ol osylaısha ýaqyt sozbaq bolǵan. Atalǵan fakt QR QK-niń 273-babynyń 1-bóligi boıynsha (Terorızm aktisi týraly kórineý jalǵan habarlama) tirkeldi», - deıdi vedomstvodan.
İshki ister mınıstrliginiń málimetinshe, ustalǵan adam ýaqytsha ustaý ızolátoryna qamaldy.