Konstıtýsıaǵa engiziletin ózgertýler men tolyqtyrýlar halyqtyń sheshimimen tikeleı baılanysty.
Ortalyq komýnıkasıalar qyzmetinde ádilet vıse-mınıstri Alma Muqanova 5 maýsymda ótetin referendým jaıynda jan jaqty túsindirdi, dep habarlaıdy Almaty-akshamy.kz Qazaqtv.com-ǵa silteme jasap.
Onyń aıtýynsha ortalyq saılaý komısıasy saılaýǵa qatysýy múmkin adamdardyń tizimin jasaýda. Konstıtýsıaǵa 56 ózgertý men tolyqtyrý engizý kózdelgenimen búlletende tek bir ǵana suraq bolady. Iaǵnı turǵyndar ata zańǵa ózgertý kerek pe, álde joq pa?- degen saýalǵa daýys beredi. Mınıstrlik ókiliniń paıymynsha halyqtyń basym bóligi «ıá» dep daýys bergen jaǵdaıda ǵana reforma júzege asady.
"Nelikten men 11 oblys týraly aıtyp otyrmyn? «Respýblıkalyq referendým týraly» Konstıtýsıalyq Zań boıynsha referendýmǵa shyǵarylatyn másele, eger ol úshin óńirlerdiń keminde úshten ekisinde daýys berýge qatysqan azamattardyń jartysynan astamy jaqtap daýys berse, qabyldandy dep esepteledi. Aıta keteıin, qazir Qazaqstanda 17 óńir bar. Jańa 3 oblysty qurý týraly Jarlyǵy – osy jyldyń 8 maýsymynan bastap qoldanysqa engiziledi. Sondyqtan 5 maýsym ótkiziletin referendýmǵa 17 óńir qatysatyn bolady", - dedi QR ádilet Vıse-mınıstri Alma Mukanova.
Eske sala keteıik, Qazaqstandaǵy referendýmdy ótkizýge qazynadan 16 mlrd 460 mln teńge qarjy bólindi. Bul esepti ortalyq saılaý komısıasy jarıalady. Al úkimet qaýlysy búgin qabyldandy.