Qalanyń birshama bóligin sýdyń basýyna sebep bolǵan 11 mamyr kúngi 33,8 mm kólemde jaýǵan jaýyn-shashyn bul máseleniń ózektiligin taǵy bir ret dáleldedi.
Almatyda jaýyn kezinde sý basyp qalatyn oryndardy boldyrmaýǵa baǵyttalǵan aryq júıesi men sý sharýashylyǵy nysandaryn modernızasıalaýdyń jospary ázirlendi, dep habarlaıdy Almaty-akshamy.kz
Atap aıtqanda, aryq jelilerin Ulyqbek jáne Saın kósheleriniń qıylysynda ornalasqan kolektorǵa shuǵyl qosylý boıynsha jumystar júrgizilýde, bul óz kezeginde aryq jelisin sý ótkizý qabilettiligin ulǵaıtyp, tómengi aýmaqtarǵa ketetin sý aǵynyn azaıtýǵa múmkindik beredi.
Aryq júıesin jańǵyrtý jumystary únemi sý basatyn Tóle bı, Iassaýı, Momyshuly kósheleri men Raıymbek batyr dańǵylynda da júrgizilip jatyr.
Eske salsaq, buryndary qala ákimi Erbolat Dosaevtyń tapsyrmasymen sý basý máselesin sheshý maqsatynda sý sharýashylyǵy nysandary tehnıkalyq jaı-kúıine taldaý júrgizildi. Bul jumystyń barysynda qala aýmaǵynda únemi sý basatyn 56 aımaq anyqtaldy. Sonymen qatar problemalyq aýmaqtardaǵy sý basý máselesin sheshý úshin jumys istep turǵan aryq jelileri men kolektorlardy ótkizý qabiletin ulǵaıta otyryp qaıta jańartý jáne biryńǵaı jelige qosýdy uıymdastyrý qajettiligi anyqtaldy.
Qala aýmaǵynda jańbyr jáne erigen qar sýlaryn burýǵa arnalǵan 16 kolektor bar. Zertteý kórsetkendeı, olar ıesiz jáne qyzmet kórsetilmegen, qoqystalǵan, bitelgen nemese buzylǵan bolyp tabylady. Kolektorlardyń jalpy sanynyń 12-si aryq jelilerine qosylmaǵan. Alataý aýdanynda 2013 jyldan 2018 jylǵa deıin salynǵan 4 kolektor ǵana aryq jelilerimen qosylǵan jáne jumys isteıdi.
Bıylǵy jyly jalpy uzyndyǵy 376 km bolatyn qalanyń aryq jelisin salý jáne modernızasıalaý boıynsha joba ázirlendi (batys bóligi - Alataý, Naýryzbaı, Áýezov aýdandary, ortalyq bóligi - Jetisý, Bostandyq, Almaly aýdandary, shyǵys bóligi - Medeý, Túrksib aýdandary).
Jobada qoldanystaǵy aryq jelilerin rekonstrýksıalaý, jańa aryqtardyń núkteli qurylysyn júrgizý qarastyrylǵan.Alaıda osy jelilerdi jasyl jelekterdi sýarýǵa paıdalaný kózdelmegen, jańbyr jáne erigen sýlardy qoldanystaǵy kolektorlarǵa burý eskerilmegen, bul jekelegen aýmaqtardyń sýdyń astyna qalýyna ákep soǵady.
Sondyqtan qoldanystaǵy aryq jelileri men kolektorlardyń ótkizý qabiletin ulǵaıta otyryp, olardy rekonstrýksıalaý jáne qurylys jumystaryn toqtatpaı biryńǵaı jelige qosýdy uıymdastyrýdy eskere otyryp, jobaǵa túzetý engiziledi. Bul jasyl jelekterdi sýarýǵa jáne sý basý qaýpiniń aldyn alýǵa múmkindik beredi.
Búginde kúni qalanyń batys bóliginde uzyndyǵy 119 km aryq jelilerin salý jáne rekonstrýksıalaý boıynsha qurylys-montaj jumystary júrgizilýde, oryndalý merzimi - 2021-2023 jyldar.