Óz bolashaǵyn aıqyndaýda halyq belsendiligi joǵary, dedi brıfıń barysynda Qyrǵyzstan Ortalyq saılaý komısıasynyń múshesi Ábdijapar Bekmatov.
«Qazaqstan azamattary men el úshin búgingi saılaý – óte mańyzdy oqıǵa. Saılaý komısıalary, memlekettik organdar referendýmǵa daıyndyq boıynsha, el halqyn aqparattandyrý boıynsha úlken jumys atqardy», – dep atap ótti Qyrǵyzstan OSK múshesi Ábdijapar Bekmatov.
Onyń aıtýynsha, komısıa qazirdiń ózinde Nur-Sultandaǵy birneshe ýchaskege baryp, barlyǵyna daýys berý úshin qajetti jaǵdaılar jasalǵanyna, qatysýshylardyń belsendiligi joǵary ekendigine kóz jetkizdi. Halyq búgingi kúnniń jaýapkershiligin jaqsy sezinýde.
Elimizdiń Negizgi zańyna túzetýler engizý boıynsha referendým ótkizý týraly jarlyqqa prezıdent Qasym-Jomart Toqaev 5 mamyrda qol qoıdy. Qazaqstandyqtar túzetýlerge «qoldap» nemese «qarsy» daýys beretin bolady. Referendýmda Qazaqstannyń 11,7 mln-nan astam azamaty daýys bere alady.
Qazaqstanda daýys berýge arnalǵan 10 myńnan astam ýchaske qurylǵan. Shetelde daýys berý ýchaskeleri álemniń 52 elinde ashyq.