2021 jyldan bastap zańsyz bastalǵan 1,5 myńǵa jýyq qylmystyq is toqtatyldy
Qylmystyq proseste bıznesti qorǵaý – prokýratýra organdary jumysynyń basty baǵyttarynyń biri. Dál osy salada kásipkerler eń qatal qysymǵa tap bolady. Tergeý barysynda múlikke tyıym salynady, tintý, jaýap alý, qujattardy alý syndy áreketter júrgiziledi, dep habarlaıdy Almaty-akshamy.kz Bas prokýratýranyń baspasóz qyzmetine silteme jasap.
Tek qana 2021 jyldan bastap zańsyz bastalǵan 1,5 myńǵa jýyq qylmystyq is toqtatyldy. Bul rette, keńselerde 2 myń tintý men alý júrgizilgen, 60 kásipkerdiń múlki tárkilengen.
Prokýrorlar jekelegen tergeý organdarynyń shtattyq mamandardyń qorytyndylary negizinde bızneske qarsy is qozǵaý praktıkasyn keńinen qoldanǵanyn anyqtady. Qylmystyq orbıtaǵa júzdegen kásipkerler tartylǵan.
Bul rette, mamandardyń tujyrymdary jetkilikti málimettermen bekitilmegen jáne de sot sarapshylary tarapynan jıi teriske shyǵarylǵan.
Osyǵan baılanysty, adal bıznesti qylmystyq orbıtaǵa tartý faktilerin azaıtý maqsatynda Bas prokýratýra qylmystyq qýdalaý organdarynyń zańsyz is-áreketteri men sheshimderiniń jolyna jedel tosqaýyl qoıý úshin qosymsha sharalar ázirledi.
«Bas Prokýror barlyq qylmystyq qýdalaý organdaryna kásipkerlik sýbektilerine qatysty sotqa deıingi tergep-tekserýlerdi tirkeý tártibin qatań reglamentteıtin nusqaý joldady. Atap aıtqanda, azamattyq-quqyqtyq sıpattaǵy aryzdar men habarlamalardy sotqa deıingi tergep-tekserýdiń biryńǵaı tiziliminde (SDTBT) tirkeýge tikeleı tyıym salyndy», - delingen habarlamada.
Jańa talap retinde tekseris, revızıa nemese aýdıt aktilerine shaǵym jasaý merzimderiniń qoldanylý kezeńinde kásipkerlik sýbektisine qatysty sotqa deıingi tergep-tekserýdi tirkeýge tyıym salý qaǵıdaty engizildi.
Sondaı-aq kásipkerdiń qarajatty únemdeý nátıjesinde paıda tabý faktileri, eger bul oryndalǵan jumystyń sapasyna teris áser etpese, tergep-tekserýge jatpaıdy.
Bul birinshi kezekte memlekettik satyp alý jáne kvazımemlekettik kompanıalardyń tenderleri boıynsha jumystarǵa qatysty.
Qylmystyq qýdalaý organdaryna shtattyq krımınalıs mamandardyń resmı qorytyndylaryn tergeýdi bastaýǵa negiz retinde paıdalanbaý tapsyryldy.
«Mundaı jaǵdaılarda keltirilgen zalal týraly málimetter qylmystyq qýdalaý organdaryna rastaýshy qujattarǵa negizdelgen jáne buzylǵan quqyqtyń naqty normalaryn kórsetetin naqty jáne obektıvti derekter qamtylǵan táýeldi emes memlekettik organdar mamandarynyń qorytyndylarymen bekitilýi tıis. Prokýrorlarǵa bir táýlik ishinde árbir qylmystyq is boıynsha sotqa deıingi tergep-tekserýdiń bastalýynyń zańdylyǵyn tekserý jáne osy kezeńde buzýshylyqtar anyqtalǵan kezde qylmystyq qýdalaýdy dereý toqtatý tapsyryldy», - delingen habarlamada.
Budan basqa, prokýrorlar turaqty túrde bıznes sýbektisine qatysty jasyryn tergeý áreketterine bastamashylyq jasaýdyń jáne olardy júrgizýdiń, sondaı-aq múlikke bılik etýge ýaqytsha shekteýler qoıýdyń negizdiligin dereý tekserýge mindetti.
Prokýrorlar zańdylyqtyń buzylýyn anyqtaǵan jaǵdaıda, zańsyz sheshimderdiń kúshin joıýdan basqa, barlyq kináli laýazymdy tulǵalardyń, tipti qylmystyq jaýapkershilikke deıin, jaýaptylyǵy týraly másele qoıý tapsyryldy.