Turǵyndardyń bereshegi jabylyp, ósimpuly alynyp tastalady
«Qazaqtelekom» órtten zardap shekken qostanaılyqtardyń telekomýnıkasıa qyzmetterine qaryzyn keshirip, jyl sońyna deıin Áýlıekól aýdanynyń turǵyndaryn abonenttik tólemnen bosatty. Bul týraly atalǵan uıymnyń basqarma tóraǵasy Qýanyshbek Esekeev málim etti, dep habarlaıdy Almaty-akshamy.kz QazAqparatqa silteme jasap.
«Zardap shekkenderge múmkindiginshe tezirek qalypty ómirge oralýyna kómektesý úshin qolymyzdan kelgenniń bárin jasaýǵa daıynbyz. Osyǵan baılanysty kompanıa basshylyǵy bıylǵy jyldyń sońyna deıin baılanys qyzmetteri úshin tólemderdi toqtata turýdy, abonentterdiń qaryzdaryn jáne qyzmetterdi ýaqtyly tólemegeni úshin ósimpuldy joıý týraly sheshti», - dedi «Qazaqtelekom» AQ basqarma tóraǵasy Qýanyshbek Esekeev.
Basqarma tóraǵasy naqtylap ótkendeı, Áýlıekól aýdanyna qarasty Ozernoe, Lesnoe jáne Amanqaraǵaı aýyldary turǵyndarynyń bereshegi jabylyp, ósimpuly alynyp tastalady.
Sonymen qatar búginde atalǵan kompanıanyń mamandary úsh eldi mekendegi baılanys jelilerin qalpyna keltirý jumystaryn júrgizýde. Órt saldarynan Amanqaraǵaı men Ozernoe aýyldaryndaǵy baılanys jelisi ornatylǵan 50-ge jýyq aǵash baǵany janyp ketken. Munymen qosa, jalpy uzyndyǵy 3 shaqyrym bolatyn kabelder zaqymdalǵan.