Fınaldyq kezeńde medaldar sporttyń tórt túri boıynsha oınatyldy
22-24 mamyr aralyǵynda Nur-Sultan qalasynda J.Úshkempirov atyndaǵy jekpe-jek saraıynda Qazaqstan Respýblıkasy Mádenıet jáne sport mınıstriniń Kýbogi úshin týrnırdiń fınaldyq kezeńi ótti. Jarysqa elimizdiń sport ınternattary men kolejderiniń 2006-2007 jyldary týǵan jasóspirimderi qatysty, dep habarlaıdy Almaty-akshamy.kz.
QR Mádenıet jáne sport mınıstri Dáýren Abaev saltanatty ashylý rásimine qatysyp, jarystyń aqtyq kezeńin baqylady, onyń qorytyndysy boıynsha jeńimpazdar men júldegerlerge medaldar tabystady.
«Sportshylar men jattyqtyrýshylar jáne bolashaq chempıondardyń ata-analary úshin shyn júrekten qýanyshtymyn. Óńirlerde osy jarysty ótkizý týraly bastamany úlken yntamen qarsy alǵandary qýantady. Kúrdeli irikteý kezeńderinen keıin elordada eń myqty sportshylar jınaldy. Bul jarystardyń atmosferasy sizderge jaǵymdy emosıa men ádemi áser syılaıdy, al jarqyn jeńis qosymsha serpin men motıvasıa beredi dep senemin», - dedi mınıstr.
Sondaı-aq, Dáýren Abaev atalǵan jarys dástúrli túrde ótetinine jáne jas talanttardy ashýǵa kómektesetinine senim bildirdi.
Aıta keteıik, 1-4 mamyr aralyǵynda ótken irikteý kezeńine respýblıkanyń barlyq óńirinen 17 komanda qatysty. Óńirlik týrnır Nur-Sultan, Almaty, Aqtóbe jáne Taraz qalalarynda ótti.
Fınaldyq kezeńde medaldar sporttyń tórt túri boıynsha oınatyldy: boks, dzúdo, grek-rım jáne erkin kúres. Mınıstrdiń debúttik Kýbogynyń jalpy júlde qory 10 mıllıon teńgeni quraıdy. 1 oryn - 5 mıllıon, 2 oryn – 3 mıllıon, 3 oryn – 2 mıllıon teńge.
Jarys qorytyndysy:
1 oryn - Q. Muńaıtpasuly atyndaǵy olımpıada rezerviniń respýblıkalyq mamandandyrylǵan mektep-ınternat-kolledji (Nur-Sultan qalasy)
2 oryn - Kárken Ahmetov atyndaǵy olımpıada rezerviniń respýblıkalyq mamandandyrylǵan mektep-ınternat-kolledji (Almaty qalasy)
3 oryn - Qyzylorda oblysynyń «Jalańtós Bahadúr atyndaǵy olımpıada rezerviniń oblystyq mamandandyrylǵan mektep-ınternat-kolledji» KMM (Qyzylorda oblysy).
