Pılottyq joba Astana-Temirtaý ýchaskesinde iske asyrylady.
QR IIDM kóliktik baqylaý qyzmetterin avtomattandyrý maqsatynda «Sergekti» paıdalaný múmkindigin qarastyryp jatyr, dep habarlaıdy Almaty-akshamy.kz Zakon.kz-ke silteme jasap.
Qazirgi kezde QR IIDM jol qozǵalysy erejelerin buzýshylyqtardy avtomatty foto-beıne tirkeý úshin Astana-Temirtaý ýchaskesinde pılottyq jobany iske asyrýdy kózdep otyr.
Mınıstrlik ókilderi bul joba iri kólemdi jáne aýyr salmaqty avtokólikterdiń qatysýymen bolatyn quqyq buzýshylyqty, sondaı-aq jolaýshylar men bagajdy turaqty nemese turaqty emes tasymaldaý kezindegi qaýipsizdikti avtomatty túrde anyqtap, kóliktik baqylaýdy júzege asyrý kezinde adamı faktor men sybaılas jemqorlyq táýekelderin boldyrmaý arqyly jol tóseminiń saqtalýyn qamtamasyz etý boıynsha áleýmettik jáne ekonomıkalyq tıimdilikke qol jetkizýge septigin tıgizetinin aıtty.
22 jeltoqsanda İshki ister mınıstriniń orynbasary Sáken Sársenov pen Indýstrıa jáne ınfraqurylymdyq damý vıse-mınıstri Dınara Sheglovanyń tóraǵalyǵymen jumys otyrysy ótkizilip, onyń barysynda ishki ister organdarynyń elimizdiń qalalaryndaǵy avtojoldarda jol qozǵalysy erejelerin buzýshylyqtardy avtomatty foto-beıne tirkeý boıynsha jumys tájirıbesi talqylandy.
Statısıkaǵa sáıkes, keıingi 4 jylda elimizde 55 myńǵa jýyq jol-kólik oqıǵasy tirkelip, onyń saldarynan 60 myńnan astam adam zardap shegip, 8 myńnan astam adam qaza tapqan.
Bul rette «Sergek» aparattyq-baǵdarlamalyq júıesi engizilgen sátten bastap, elimizdiń joldarynda ólim-jitimniń 50%-dan asa tómendeýi baıqalyp, qoǵamdyq oryndardaǵy qylmys aıtarlyqtaı azaıypty. Sondaı-aq jol qozǵalysy erejelerin saqtamaǵany úshin tólenetin aıyppuldardyń esebinen búdjetke 50 mlrd teńgege jýyq qarajat túsken.