Bólek qurylǵan Eńbek mınıstrligi sala boıynsha jańa ulttyq saıasatty ázirleýi qajet
Qazaqstanda eńbek jáne halyqty áleýmettik qorǵaý mınıstrligin eki vedomstvoǵa bólý ıdeıasy usynyldy, dep habarlaıdy Almaty-akshamy.kz QazAqparatqa silteme jasap.
«Eldiń ornyqty áleýmettik-ekonomıkalyq damýy jáne qazaqstandyqtardyń laıyqty ómir súrý deńgeıin qamtamasyz etý úshin eńbek salasynyń strategıalyq mańyzdylyǵyn, sondaı-aq mınıstrliktiń sala máselelerin sheshýdegi kópjyldyq qabiletsizdigin eskere otyryp, memlekettik búdjetten jumsalatyn shyǵyndardy ulǵaıtpaı atalǵan vedomstvony Eńbek mınıstrligi jáne áleýmettik damý mınıstrligi dep bólgen jón», - dedi QR Parlamenti Májilisiniń depýtaty Erlan Smaıylov depýtattyq saýal joldaı otyryp.
Depýtattyń málimdeýinshe, atalǵan mınıstrlik eńbek quqyqtaryn qorǵaý men áleýmettik qorǵaý salasyndaǵy máselelerdi sheshýge kelgende múldem enjar.
«Qoǵam eńbek jáne halyqty áleýmettik qorǵaý mınıstrliginiń problemalyq máselelerdi sheshýdegi belsendi ustanymyn kórmeı otyr. El azamattarynyń múddesi úshin eńbek salasy men áleýmettik salany turaqty damytý ıdeologıasyn áldeqashan joǵaltqan. Atalǵan vedomstvo qıt etse búdjette jáne zańnamada qarastyrylmaǵan dep silteı salady. Psıhologıada bul úırengen dármensizdik sındromy dep atalady», - deıdi ol.
Sondaı-aq, spıker mınıstrlikti memlekettik búdjetten qarjy shyǵyndamaı ekige bólý kerektigin aıtyp otyr.
«Bólek qurylǵan Eńbek mınıstrligi sala boıynsha jańa ulttyq saıasatty ázirleýi qajet. Jańa saıasat tabysy tómen qazaqstandyqtardyń problemasyn, jumys berýshiler men jumysshylardyń múddelerin, eńbek naryǵyndaǵy teńsizdikti, ádiletsiz zeınetaqy júıesin, jumyssyzdyqty, jumys istep turǵan kedeıshilik problemalaryn sheshýge baǵyttalýy tıis», - dedi E. Smaıylov.