Senat otyrysynan keıin BAQ ókilderiniń saýalyna jaýap bergen Ónerkásip jáne qurylys mınıstriniń orynbasary Azamat Beıisbekov qorǵanys salasyndaǵy eki kásiporyndy jekeshelendirýdi josparda bar ekenin aıtty, dep habarlaıdy almaty-akshamy.kz.
«Bizde qazir jumys istep turǵan kásiporyndardyń birine ozyq tehnologıalary bar ınvestor kelip, qosymsha ınvestısıa salsa, zańnamaǵa sony eskeretin ózgeris usynyp otyrmyz. Naqty usynystarǵa kelsek, jekeshelendirý josparynda bir kásiporyn bar. Ol – Almatydaǵy Kırov mashına jasaý zaýyty. Biraq qazir oǵan naqty qyzyǵýshylyq bildirip otyrǵan ınvestor joq», - dedi ol BAQ ókilderiniń saýalyna bergen jaýabynda.
Sondaı-aq, Jaıyq boıyndaǵy zenıt zaýytynyń jaǵdaıyna toqtaldy.
«Jalpy qazirgi tańda Oraldaǵy zenıt zaýytyn jekeshelendirý máselesi qaralady. Ol jaqtaǵy másele jaıynda buryn da pikir bildirgenmin. Zaýyt Jaıyqtyń boıynda tur. Qazirgi tańda ónimniń bári Kaspııde qoldanylady. Sondyqtan Kaspıdiń boıynda arnaıy zaýyt salý qajettigi týyndap otyr. Mysaly, qazir Kaspııdiń keme zaýytyn salatyn ınvestor kelip, jańa zaýyt soǵatyn bolsa, oǵan jańa tehnologıalar qoldanylady. Erteń bizdiń zenıt qurastyrýshy zaýyt tapsyryssyz qalmasyn dep, ondaǵy adamdar erteń jumyssyz qalmasyn dep ınvestor tartý máselesin jan-jaqty qarastyryp jatyrmyz», - dedi vıse-mınıstr.