Bıyl konkýrstan ótken 19 kınojobanyń túsirilimine daıyndyq bastaldy.Olardyń qatarynda 2011 jyly Tarazda lańkesti ustaý kezinde erlikpen qaza tapqan Ǵazız Baıtasov týraly «Kapıtan Baıtasov» fılmi bar.
Avtorlar bul týyndy arqyly el tynyshtyǵyn qorǵaý jolynda ómirin qıǵan quqyq qorǵaý organdary qyzmetkerleriniń batyldyǵyn dáriptemek. Al «Alan týraly ańyz» anımasıalyq fılmi balalardy Otandy súıýge, dostyqqa adal bolýǵa jáne meıirimdilikke shaqyrady. Qazirgi qoǵamnyń dertine aınalǵan lýdomanıa taqyrybyn qozǵaıtyn «Igromanka» jobasy da kórermenge usynylady, dep habarlaıdy almaty-akshamy.kz.
«Qaırat» fılmi jastardyń salaýatty ómir saltyn ustanýǵa jáne sportqa degen qulshynysyn oıatady. Ulttyq kınony qoldaý memlekettik ortalyǵynyń basqarma tóraǵasy Qurmanbek Jumaǵalı pıchıngten ótken kınojoba avtorlarymen kezdesti. Ol shyǵarmashylyq top ókilderin bólingen qarajatty maqsatty jumsap, sapaly týyndy túsirýge shaqyrdy. Ári ortalyq mamandary tarapynan barlyq joba alǵashqy kúnnen, ıaǵnı «tarelka syndyrýdan» bastap, premeraǵa deıin baqylaýda bolatynyn eskertti.
«Bul fılmder búdjet esebinen túsiriletindikten, erteńgi kúni mindetti túrde halyqtyń suraýy bolatynyn umytpańyzdar. Sondyqtan, bólingen ár tıyndy eseppen, maqsatty jumsaýdy suraımyn. Biz óz tarapymyzdan ár jobanyń basy-qasynda bolamyz. Fılmder sapaly bolýy tıis. Tek festıválderde top jaryp qoımaı, óz aldyna tabys ákeletin deńgeıge jetýi kerek», – dedi Qurmanbek Jumaǵalı.
Kınoortalyq basshysy avtorlarǵa qazirden bastap jobalaryn jarnalamaýdy jáne marketıń jospar jasaýdy tapsyrdy. Qysqametrajdy jáne derekti fılm avtorlary osy bastan otandyq telearnalarmen kelisip, túsirgen týyndylaryn kógildir ekranǵa shyǵarý jaǵyn uıymdastyrýy kerek. Al tolyqmetrajdy kartınalardyń premerasy Astana men Almaty qalasynda qatar ótýi qajet.
«Kıno – jaı ǵana óner emes, qoǵamnyń ulttyq ıdeologıasyn qalyptastyratyn myqty qural. Sondyqtan, ár jobanyń ulttyq ıdeologıaǵa saı bolýyn qadaǵalaımyz. Jańa týyndylarda urpaq tárbıesine oń yqpal etetin, kórermenge oı salatyn ıdeıalar dáripteletin bolady», – dedi Qurmanbek Jumaǵalı.