180 páterlik 3 kópqabatty turǵyn úı paıdalanýǵa berildi
Qordaı aýdany Gvardeısk qalashyǵyndaǵy Bıologıalyq qaýipsizdik problemalary ǵylymı-zertteý ınstıtýty qyzmetkerlerine arnalyp salynǵan jalpy 180 páterlik 3 kópqabatty turǵyn úı paıdalanýǵa berildi, dep habarlaıdy Almaty-akshamy.kz QazAqparat agenttigine silteme jasap.
El Táýelsizdiginiń 30 jyldyǵyna oraı ótken páter kiltin tapsyrý saltanatty sharasyna qatysqan oblys ákimi Berdibek Saparbaev qonys toı ıelerin quttyqtap, ǵalym-mamandardyń, qurylysshylardyń eleýli eńbegin atap ótti.
«Jaqynda ǵana oblysymyzǵa jumys saparymen kelgen QR Prezıdenti Qasym-Jomart Toqaev aıtqandaı, shyn máninde bul úlken jetistik. Elimiz úshin qajetti óndiris. Sizder Qazaqstandy álemge taǵy bir tanyttyńyzdar. Bizdiń elimizde de bıotehnologıanyń damyǵanyn, joǵary bilikti ǵalymdardyń bar ekenin dáleldeńizder.
Shetelde mundaı óndiristi qurýǵa 3-4 jyl jumsalsa, biz toǵyz aıdyń ishinde úlken zaýyt sala aldyq. Vaksınamyz dúnıe júzinde moıyndalyp jatyr.
Memleket basshysy ǵalymdarǵa, mamandarǵa barlyq qajetti jaǵdaı jasaý, olardyń eshteńege alańdamaı jumys isteýine, ǵylymmen aınalysýyna qolaıly orta qalyptastyrý, baspanamen, balalaryn mektep jáne balabaqshamen kedergisiz qamtý, ýaqyttaryn tıimdi ótkizý boıynsha naqty tapsyrma bergen bolatyn. Sol tapsyrmanyń negizinde jalaqylaryńyz artty, sizderge arnalyp salynǵan 180 páterli turǵyn úıler búgin paıdalanýǵa berilýde. Bul ınstıtýt pen zaýyt qyzmetkerlerin tolyǵymen baspanamen qamtýǵa múmkindik beredi.
Sizderdiń qajyrly eńbekterińizdiń arqasynda óndirilip jatqan otandyq vaksınanyń koronavırýs indetine qarsy kúreske jáne halyqtyń densaýlyǵyn nyǵaıtýǵa zor úles qosatynyna senemin»,- degen aımaq basshysy qyzmetkerler men qurylysshylarǵa rızashylyǵyn jetkizdi.
Bıologıalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa barynsha qoldaý kórsetip jatqan el, oblys basshylyǵyna, qurylysshylarǵa degen yqylasyn bildirdi.
«Oblys ákimi eki jylda otyz retten astam jumys saparymen kelip, bizdegi qurylys barysymen, máselelerimizben, jaǵdaıymyzben jıi tanysyp otyrdy. Sonyń nátıjesinde barlyq jumystar der kezinde ári sapaly oryndaldy. Instıtýt qyzmetkerleri úshin barlyq qajetti jaǵdaılar jasalýda. Atap aıtar bolsaq, turǵyn úıler, balalar oıyn alańshalary, dene shynyqtyrý-saýyqtyrý kesheni salyndy. Talaı jyldan beri ınstıtýt qyzmetkerlerin turǵyn úımen qamtamasyz etý máselesi alǵash ret sheshimin tapty. Elimizdiń jáne oblys basshylyǵyna úlken alǵysymyzdy bildiremiz!», – deı kele Kúnsulý Zakarıa jumystardy sapaly ári joǵary deńgeıde jalǵastyra beretindikterin jetkizdi.
Paıdalanýǵa berilgen turǵyn úılerdegi páterler tolyǵymen turmysqa qajetti jıhazdarmen jabdyqtalǵan, barlyq ınjenerlik jelilermen qamtylǵan.
Instıtýt jáne zaýyt qyzmetkerleri men olardyń balalary úshin 120 adamǵa arnalǵan dene shynyqtyrý-saýyqtyrý kesheni, oıyn alańshalary salynǵan.