Búgín, 26 shílde kúní tańerteń Abaı alańynda bírneshe júz adam jınalyp, qazaqtyń ūly oıshyly árí aǵartushysynyń 180 jyldyǵyna oraı ūıymdastyrylǵan ekologıyalyq aktsıyaǵa qatysty. Būl bastama respublıkalyq «Taza Qazaqstan» baǵdarlamasy ayasynda óttí, dep habarlaıdy Aqshamnews.kz.
Almaty qalasynyń bes audanyn — Almaly, Bostandyq, Áuezov, Medeu jáne Nauryzbaı audandaryn qamtıtyn, ūzyndyǵy 15 shaqyrymǵa sozylǵan Abaı dańǵyly boıynda abattandyru jáne sanıtarlyq tazalau boıynsha bírqatar ís-sharalar júrgízíldí.
Aktsıyaǵa túrlí ūıym ókílderí, jastar jáne belsendí qala tūrǵyndary qatysty. Olar Abaı men Dostyq kósheleríníń qıylysynda bas qosty. Ís-shara bastalar aldynda ótken otandyq estrada jūldyzdarynyń shaǵyn kontsertí qatysushylardyń kóńíl kúıín kóteríp, erekshe ruh syılady.
Ekoaktsıya – íshkí mádenıetímízdíń, tuǵan qalamyzǵa degen súıíspenshílígímízdíń jáne Abaıǵa degen qūrmetímízdíń kórínísí. Sharada sóz alǵandar Abaı Qūnanbaıūly ózíníń shyǵarmalarynda adam men tabıǵat arasyndaǵy baılanysty jyrlaǵanyn, tabıǵatqa degen qamqorlyq onyń mūrasynyń mańyzdy bólígí ekenín atap óttí.
Qazaqstan jūrtshylyǵyna tanymal mádenıet ókílderí shyǵarmashylyqtan tys ta el damuyna óz úlesterín qosuy tıís ekenín aıtyp, qoǵamǵa paıdaly mūndaı bastamalarǵa quana qatysatyndaryn jetkízdí. Olar būl arqyly otansúıgíshtík pen ortaq jauapkershílík syndy qūndylyqtardy dárípteudí kózdeıdí.
Estrada ánshísí Baǵlan Ibraımov:
– Almaty – kórkeıgen, ásem qala. Onda ómír súríp jatqan ár tūrǵyn qalanyń tazalyǵyn saqtauǵa óz úlesín qosuy tıís. Bíz mūndaı ıgí bastamalarǵa árdaıym qoldau bíldíruge daıynbyz. Tazalyq saqtau – būl bízdíń qalaǵa degen mahabbattyń naqty kórínísí, – dedí.
Almaty qalasy Mádenıet basqarmasynyń basshysy Ǵanı Maılybaev:
– Abaı alańy men onyń atyndaǵy dańǵyl – qalanyń bet-beınesí. Sondyqtan būl jer ūqypty, taza boluǵa tıís. Mádenıet basqarmasy Abaıdyń 180 jyldyǵyna arnalǵan 117 ís-shara ótkízudí josparlap otyr. Ekoaktsıya – sol baǵdarlama sheńberíndegí alǵashqy auqymdy bastama. Būl bíz úshín óte mańyzdy, – dep málímdedí.
Páter ıelerí kooperatıví (PIK) men Múlík ıeleríníń bírlestíkterí (MIB) belsendílík tanytqan qala tūrǵyndaryna alǵys bíldírdí:
– Qalada tazalyqty saqtau – árbír tūrǵynnyń míndetí. Bíz kórshílerímízdíń, tūrǵyndardyń senbílíkke atsalysyp jatqanyna quanyshtymyz. Būl – qoǵamda ózara jauapkershílík pen yntymaqtyń belgísí, – dedí PIK qyzmetkerí.
Abaı dańǵyly boıynda ornalasqan bírqatar bıznes qūrylymdar da būl bastamadan shet qalmady. Olardyń qatarynda Shafran, «Schaste» meıramhana-úıí, Avenue City Bıznes ortalyǵy, Promenade Business Park, Myata Platinum, «NAVAT» shaıhanasy, Resident Hotel Abay syndy mekemeler bar.
Sondaı-aq, ekologıyalyq senbílíkke medıtsınalyq mekemelerdíń, mektepter men balabaqshalardyń qyzmetkerlerí de jūmyldyryldy.
Jalpy qalalyq senbílíkke 5 000-nan astam adam qatysty. 159 arnaıy tehnıka bírlígí jūmyldyrylyp, 1 240 m³ kólemíndegí qoqys shyǵaryldy.
Būdan bólek, Abaı dańǵyly boıynda ashyq aspan astyndaǵy art-alań ūıymdastyrylyp, oǵan suretshíler, sketcherler men músínshíler qatysty. Būl shyǵarmashylyq keńístíktíń negízgí bólígín «QLab» urbanıstıkalyq zerthanasynyń jobalar kórmesí qūrady. Kórmede kelesí jūmystar ūsynyldy:
Qalanyń shynaıy ómírín beıneleıtín vernakulyarlyq audandardyń kartalary. Būl kartalar 22 000-nan astam tūrǵynnyń píkírín qamtyǵan «Qala tūrǵyny saualnamasy» nájıjesíne negízdelgen;
Qaıta óńdelgen plastıkten jasalǵan eko-mozaıkalar. Būl jūmystar «Eco Network» ūıymymen bírlesíp jasalǵan jáne keńes dáuíríndegí mozaıka óneríne zamanauı kózqarasty tanytady;
Qalalyq parkter men skverlerdíń maketterí men dızaın-jobalary. Olardy «QCi Qazaq Creative Industries» kompanıyasymen bírlese otyryp daıyndaǵan. Būl jobalarda mádenı mūrany qazírgí zamanǵy qala ınfraqūrylymymen úılestíru joldary kórsetílgen.
Sonymen qatar, «QLab» ınstıtutynyń basshysy Jandos Jūmabaı «Urban Code Almaty» atty jańa urbanıstıka jurnalynyń alǵashqy sanyn jūrtshylyqqa tanystyrdy.
Aktsıyanyń kórkem sımvoly – suretshí Maıya Enker salǵan pop-up formattaǵy Abaı portretí boldy. Ís-shara sońynda qatysushylar QLab-tyń kovorkıng-keńístígínde bas qosyp, qalalyq orta sapasyn arttyru joldaryn talqylady.