«Eldiń bolashaǵy sanaly sheshimderge baılanysty»: mýzykant Aıaýlym Qunanbaı Almatyda referendýmda daýys berdi
Mýzykant, QR mádenıet salasynyń úzdigi Aıaýlym Qunanbaı Qazaqstanda atom elektr stansıasynyń (AES) salý jónindegi referendýmǵa qatysty. Artıs Zerdeli shaǵyn aýdanyndaǵy №182 mektepte ornalasqan №28 saılaý ýchaskesine baryp, daýys berdi.
«Qazaqstannyń bolashaǵy ár azamattyń sanaly sheshimine baılanysty», - dep Aıaýlym Qunanbaı osyndaı aýqymdy jáne el úshin mańyzdy is-sharalarda daýys berýdiń mańyzdylyǵyn atap ótti.
«Referendýmǵa qatysý – bul meniń elimizdiń bolashaǵyna qosqan úlesim. Mundaı máseleler jaýapkershilikti jáne bizdiń tańdaýymyz balalarymyz ben nemerelerimizdiń ómirine qalaı áser etetinin túsinýdi talap etedi. Árbir daýystyń mańyzdy ekenine senimdimin», – dedi ol.
Óner ıesi belsendi azamattyq ustanym eldiń damýyna degen adaldyq pen bolashaq urpaqqa degen qamqorlyqtyń kórinisi ekenin aıtty.
Esterińizge sala keteıik, búgin Qazaqstanda AES qurylysy máselesi boıynsha referendým ótip jatyr. Barlyq azamat saılaý ýchaskesine baryp, saǵat 20:00-ge deıin óz tańdaýyn jasaı alady.