Ultaralyq alaýyzdyq týǵyzatyn adamdar jazadan qutylmaıdy.
Bul týraly Qazaqstannyń bas prokýratýrasy málimdedi, dep habarlaıdy Almaty-akshamy.kz Elorda.info-ǵa silteme jasap.
Qadaǵalaýshy organnyń resmı málimdemesinde áleýmettik jelide áleýmettik jáne ultaralyq alaýyzdyqty týǵyzatyn aqparattar shyǵyp jatqany týraly aıtylǵan.
"Avtorlar azamattardyń ulttyq ar-namysyna nemese jalpy etnıkalyq topqa ádeıi til tıgizedi. Ózge ult ókilderine, sonyń ishinde tilge qatysty kózqarasyna qaraı kúsh qoldanýǵa ashyq shaqyryp jatady. Ádette, ondaı materıaldardyń avtorlary ustalǵannan keıin ókinip, halyq aldynda keshirip suraıdy. Biraq olar jaýapkershilikten bosatylmaıdy", – deıdi prokýrorlar.
Osy sekildi derekter Qylmystyq kodekstiń 174-baby boıynsha jazalanady. Oǵan sáıkes 2-7 jylǵa bas bostandyǵynan aıyrý, al aýyr saldary bolsa, 12-20 jylǵa bas bostandyǵynan aıyrý jazasy qarastyrylǵan.
Sonymen qatar mundaı áreketter Qylmystyq kodekstiń 3-baby boıynsha ekstremıstik qylmystarǵa jatady. Al ekstremıstik áreketter úshin qatań jaza qoldanylady. Ol adam ókinip, keshirim surasa da, tatýlassa da, qamaýǵa alynady. Bul sanattaǵy qylmystar merzimi eskirgen isterge de jatqyzylmaıdy. Sondyqtan kez kelgen ýaqytta tergeýdi bastaýǵa bolady. Oǵan raqymshylyq jasalmaıdy.
"Budan bólek, merziminen buryn bosatý qoldanylmaıdy, jeńil jazamen aýystyrý nemese jazany keıinge qaldyrý da qarastyrylmaǵan. Ekstremıstik qylmystar úshin sottalǵandar terorızm jáne ekstremızmmen baılanysy bar uıymdar men tulǵalardyń tizimine engiziledi. Sodan bastap qarjy men múlkin paıdalaný jaǵynan shekteý qoıylady. Belgili bir bank operasıalaryn da jasaı almaıdy", – dep atap ótti prokýrorlar.
Statısıka boıynsha 2019 jyldan beri Qazaqstanda 21 adam ultaralyq alaýyzdyqty týǵyzǵany úshin sottaldy. Máselen, 2021 jyly Almaty turǵyny 7 jylǵa bas bostandyǵynan aıyryldy. Sol sıaqty WhatsApp jáne YouTube arqyly etnıkalyq dıaspora ókilderine qatysty namysqa tıetin pikir aıtqan almatylyq 5 jylǵa sottaldy.