Kelgen vaksına QR DSM SEBK-niń ruqsattamasyna sáıkes jedel túrde elimizdiń óńirlerine jiberildi
Almatyǵa Pfizer (Comirnaty) kompanıasy shyǵarǵan COVID-19-ǵa qarsy vaksınanyń kezekti partıasy keldi, dep habarlaıdy Almaty-akshamy.kz «Habar 24» telearnasyna silteme jasap.
Júk quramyna 266 760 doza kirdi. Pfizer kompanıasymen júrgizilgen kelissózderdiń qorytyndysy boıynsha Biryńǵaı dıstrıbútor barlyǵy 4 mln 230 myń doza satyp aldy.
Qabynýǵa qarsy preparatty amerıkandyq Pfizer kompanıasy jáne Germanıanyń BioNTech tehnologıalyq kompanıasy shyǵarǵan. Comirnaty Pfizer/BioNTech vaksınasyn DDU-y shuǵyl paıdalanýǵa ruqsat etilgen.
Kelgen vaksına QR DSM SEBK-niń ruqsattamasyna sáıkes jedel túrde elimizdiń óńirlerine jiberildi.
Comirnaty vaksınasyn jetkizý tikeleı oblystyq Densaýlyq saqtaý basqarmalarynyń qoımalaryna júzege asyrylady. Vaksınalardy tasymaldaý «sýyq tizbek» qaǵıdaty boıynsha júrgiziledi — árbir kezeńde temperatýralyq rejımdi qatań saqtaý qamtamasyz etiledi. Sonymen qatar, ár deńgeıde óziniń jaýapty uıymy jáne jaýapty tulǵalary bar.
Vaksına logıstıkasynyń operatory - Comirnaty vaksınasyn tasymaldaýǵa mamandandyrylǵan Pfizer kompanıasynyń seriktesi bolyp tabylatyn UPS halyqaralyq logıstıkalyq kompanıasy. UPS kompanıasy vaksınalardy últra tómen temperatýralyq rejımdi qoldaıtyn «Pfizer» kompanıasynyń «Softbox» arnaıy tasymaldaý konteınerlerinde tasymaldaıdy. Pfizer tıimdi tasymaldaý, saqtaý jáne temperatýrany baqylaý úshin tolyq logıstıkalyq josparlar men quraldardy jasady.
Sýyq tizbekti saqtaı otyryp, vaksınany saqtaý jáne tasymaldaý týraly naqty nusqaýlar bar. Vaksınany saqtaý jónindegi nusqaýlardy naqty oryndaý jáne jaǵymsyz saldardyń aldyn alý úshin Comirnaty vaksınasyn jetkizýge jáne qoldanýǵa daıyndyq sharalary júrgizildi.
Elimizdiń bas sanıtarlyq dárigeri halyqty koronavırýstyq ınfeksıaǵa qarsy Comirnaty vaksınasymen vaksınasıalaý boıynsha ádistemelik usynymdardy bekitti. Comirnaty preparatymen vaksınasıa júrgiziletin barlyq medısınalyq uıymdar daıyndyq júrgizdi. Óndirýshi usynǵan sýyq tizbekke qoıylatyn talaptarǵa sáıkes últra tómen temperatýra -60 -90 So rejıminde saqtaýǵa arnalǵan muzdatqysh jabdyqtar satyp alyndy. Sondaı-aq vaksınany engizý jáne suıyltý úshin qajetti shprıster qory satyp alyndy.
Pfizer kompanıasy vaksınasıaǵa qatysatyn tıisti qyzmetkerlerdi vaksınamen durys, qaýipsiz jáne tıimdi jumys isteýge jáne ony qoldanýǵa úıretti. Pfizer farmasevtıkalyq kompanıasynyń Qazaqstandaǵy ókildigi Comirnaty vaksınasy týraly qazaq jáne orys tilderindegi mamandandyrylǵan nusqaýlyq-saıt iske qosty. Saıtta vaksına, ony qoldaný jáne saqtaý ádisteri, klınıkalyq zertteýlerdiń nátıjeleri týraly barlyq aqparat bar.
Biryńǵaı dıstrıbútor «SK-Farmasıa» JSHS-i úshin dári – dármekterdi satyp alý jáne dıstrıbúsıalaý kezinde basymdyq bul - sapasy men qaýipsizdigi, sondaı-aq vaksınalardy saqtaý jáne tasymaldaý kezinde temperatýralyq rejımdi saqtaý.