Qarjylyq aýdarym júıesi arqyly shetelden Qazaqstan Respýblıkasyna keletin qarajat kólemi aıtarlyqtaı azaıǵan.
Aǵymdaǵy jyldyń qańtar aıynda shetelden Qazaqstan Respýblıkasyna qarjylyq aýdarym júıesi arqyly jiberilgen qarajat kólemi 13,6 mlrd teńgeni qurady, bul 2021 jyldyń qańtarymen salystyrǵanda 30,5%-ǵa az, dep habarlaıdy Almaty-akshamy.kz Finprom.kz saıtyna silteme jasap.
Sáıkes kezeńdegi bul kórsetkish úshinshi jyl qatarynan tómendep keledi.
Shetelden Qazaqstan Respýblıkasyna qarjylyq aýdarym júıesi arqyly aýdarylǵan qarjynyń úshten ekisine jýyǵy AQSH dollarymen jiberilgen (2022 jylǵy qańtarda – jalpy aýdarym kóleminiń 63,9%-y). Odan keıingi orynda turǵan ulttyq valúta – teńgemen jasalǵan aýdarymdar jalpy aýdarym kóleminiń 25%-n qurady. Al rúblmen jasalǵan aýdarymdar úlesi tórtinshi jyl qatarynan azaıyp keledi; 2022 jyldyń qańtarynda ol nebári 6,1%-dy qurady, eýronyń úlesi 4,9%-dy qurady.
AQSH valútasymen alynǵan bir aýdarym boıynsha ortasha chek bir jyl ishinde 780 dollardan 758 dollarǵa deıin tómendedi. Teńgedegi bir aýdarym boıynsha ortasha chek, kerisinshe, 127,7 myńnan 190,9 myń teńgege deıin ósti. Reseı valútasyndaǵy bir aýdarym boıynsha ortasha chek te– 22,5 myńnan 23,6 myń rúblge deıin ósti. Eýrovalútadaǵy bir aýdarymnyń ortasha chegi 436 eýrodan 400 eýroǵa deıin tómendedi.
2022 jyldyń qańtarynda Qazaqstan Respýblıkasyna qarjylyq aýdarym júıesi arqyly jiberilgen aqshanyń eń kóp kólemi Ózbekstannan jóneltilgen – jalpy somasy 2,5 mlrd teńge.
Odan keıingi oryndarda Ońtústik Koreıa (2,1 mlrd teńge) jáne AQSH (1,9 mlrd teńge) tur. Buǵan deıin kósh bastap kelgen Reseı 2022 jyldyń qańtarynda nebári 1,6 mıllıard teńge aýdarymmen tórtinshi orynǵa ıe boldy.
