Naýqan osy jyldyń 20 jeltoqsanyna deıin jalǵasady
Qazaqstandyq oqýshylar men ata-analar mektep ájethanalary, jýynatyn bólmelerdegi problemalar jáne asqanasyndaǵy buzýshylyqtar týraly Oqý-aǵartý mınıstrligine habarlaı alady. Bul týraly Almaty-akshamy.kz mınıstrlikke silteme jasap habarlaıdy.
Aıta keterligi, avtorlardyń anonımdiligine kepildik berilip, olar týraly aqparat jarıa etilmeıdi. Mektep ájethanalary men asqanalaryndaǵy kemshilikter týraly foto jáne vıdeony 8 700 699 04 46 nómiri arqyly What’s App jáne Telegram-BOT-qa, Instagram jelisindegi @balaga.laiyq paraqshasyn belgileý arqyly jiberýge bolady. Sondaı-aq mektepterge osy áleýmettik jelilerge siltemeleri bar QR-kodtar qosymsha jiberildi.
Oqý-aǵartý mınıstrligi Balalardyń quqyqtaryn qorǵaý komıtetiniń bastamasymen «Balaǵa laıyq» aksıasy ótip jatqanyn eske sala keteıik. Aksıa «Mekteptiń jaqsarýyna kómektes!» uranymen ótip jatyr. Sondaı-aq naýqan osy jyldyń 20 jeltoqsanyna deıin jalǵasady.
«Aksıaǵa kez kelgen oqýshylar, eriktiler, balalar ókildigi, muǵalimder, ata-analar, úkimettik emes uıymdardyń ókilderi jáne t.b. qatysa alady. «Balaǵa laıyq» aksıasynyń nátıjesinde mekteptegi jýynatyn bólmeler men asqanalardyń jaǵdaıy aıtarlyqtaı jaqsarǵanyn aıta ketken jón. Zań buzýshylyqtar anyqtalǵan 100-den astam mektepte jóndeý jumystary júrgizilip, kemshilikter joıyldy. Mysaly, Pavlodar qalasyndaǵy №5 orta mekteptiń ájethanasyndaǵy kabınalar ata-analardyń mınıstrlik ókilderine bergen ótinishinen keıin qalypqa keltirildi. Soltústik Qazaqstan oblysy Aryqbalyq aýylynyń mektebinde sý qubyrlary aýystyrylyp, jóndeý jumystary júrgizildi. Oral ınovasıalyq lıseıi asqanasynyń jumysyna qatysty túsken ótinishten keıin mektepte asqanaǵa dezınfeksıa júrgizilip, oqýshylardy tamaqtandyrý sapasy jaqsartyldy. Mekteptegi ájethanalar men asqanalarǵa monıtorıń jazalaý úshin emes, balalarǵa qajetti jaǵdaı jasaýǵa mektepterdi birlese tartý úshin júrgizilip jatqanyn atap ótkim keledi»,- dedi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Aksıa kezinde mektepterdiń jýynatyn bólmeleri men asqanalarynyń jaǵdaıy týraly barlyǵy 1 000-nan astam shaǵym tústi. Eń belsendilerdiń arasynda Astana men Almaty qalalarynyń, Almaty, Aqmola jáne Qyzylorda oblystarynyń oqýshylary men ata-analary bar. Árbir ótinishti oblystyq bilim basqarmalary qaraıdy. Usaq-túıek kemshilikterdi mektepterdiń ózi anyqtap, joıady.