Kýpúrany tekserýge birneshe mınýt ýaqyt ketedi.
Ústimizdegi jyldyń alty aıynda qazaqstandyq mamandar 408 150 teńgeniń qoldan jasalǵanyn anyqtaǵan.Bul ótken jylǵy kórsetkishtermen salysytyrǵanda 41%-ǵa az, dep habarlaıdy Almaty-akshamy.kz.
«2022 jyldyń İ jartyjyldyǵynda Qazaqstan Ulttyq Banki men ekinshi deńgeıli bankter 408 150 teńgeniń qoldan jasalǵan 139 aqsha belgisin (136 banknot pen 3 moneta) anyqtady»,- delingen Ulttyq banktiń baspasóz qyzmetiniń habarlamasynda.
QUB banknottar men monetalardy saraptaý basqarmasynyń bastyǵy Asqat Muqamadıevtiń aıtýynsha, kóp jaǵdaıda nomınaly 2 000 teńgelik banknottar (97 dana) qoldan jasalǵan. Olar jalpy kólemniń 70%-yn quraıdy. Nomınaly 5 000 teńgelikten – 15 dana (11%), 10 000 teńgelikten – 10 dana (7%) aqsha qoldan jasalǵan. Qalǵan 9%-y ózge nomınaldaǵy banknottarǵa tıesili.
Jalǵan banknottardyń kóp bóligi Almatyda – 68 dana (jalpy kólemniń
51%-y), Nur-Sultan qalasynda – 16 dana jáne Shyǵys Qazaqstan oblysynda – 29 dana anyqtaldy.
Qazaqstan Ulttyq Banki túpnusqa banknottardy qoldan jasalǵan aqshadan ajyratýǵa kómektesetin qarapaıym qaǵıdalardyń bar ekenin eske salady. Banknottarda beder týdyratyn arnaıy mór bar.
Sol sıaqty barlyq banknottarda kórý qabileti nashar adamdarǵa arnalǵan, qolmen ustaǵanda jaqsy bilinetin dóńes tárizdi joǵary bederli element túrindegi belgiler bar.
Banknottyń túsi anyq jáne kontrastyly bolýǵa tıis, sý tańbasy men nomınaldyń sıfrlyq beınesin kórý úshin banknotty jaryqqa baǵyttap kórý qajet.
Banknot betindegi jazýlary bar tutas jip tárizdes, jaryqta anyq kórinetin jazýlar bar úzik syzyq túrindegi tutas magnıttik jáne súńgýir jipke de nazar aýdarǵan jón.
Nomınaly 1 000, 2 000, 5 000, 10 000 jáne 20 000 teńgelik banknottarda túrli-tústi boıaýmen salynǵan sýret túrindegi beıneler bar. Banknottyń kólbeý buryshy ózgergen kezde beınelerdiń túsi jasyldan altyn túske deıin ózgeredi.
Kýpúrany osy ádispen tekserýge birneshe mınýt ýaqyt ketedi jáne ol banknottyń túpnusqasyn anyqtaýǵa kómektesedi. Shyn aqshany jalǵan banknottan qalaı ajyratýǵa bolatyny týraly aqparatpen Qazaqstan Ulttyq Bankiniń saıtynda tolyǵyraq tanysýǵa bolady.