QR Premer-Mınıstriniń orynbasary Eraly Toǵjanov Májilis ókilderiniń depýtattyq saýalyna bergen jaýabynda joǵary oqý oryndaryn jikteýdiń jańa modeli engiziletinin aıtty, dep habarlaıdy Almaty-akshamy.kz QazAqparatqa silteme jasap.
«Memleket basshysynyń QR Prezıdenti janyndaǵy Ulttyq qoǵamdyq senim keńesiniń úshinshi otyrysynyń qorytyndysy boıynsha bergen tapsyrmasyna sáıkes, akademıalyq jurtshylyqpen talqylaý qorytyndysy boıynsha joǵary oqý oryndaryn jikteýdiń modeli ázirlenip, akademıalyq qaýymnyń talqylaýynan ótti. Qujatty joǵary oqý oryndarynyń básekege qabilettiligin arttyrý jáne ońtaılandyrý jónindegi keńes maquldady. Sonymen qatar, joǵary oqý oryndaryn jikteýdiń bul modeli «QR Bilim salasyndaǵy keıbir zańnamalyq aktilerine ózgerister men tolyqtyrýlar engizý týraly» zań jobasynda qarastyrylǵan», dep jazdy Eraly Toǵjanov jaýabynda.
Joǵary oqý oryndary mynadaı toptarǵa bólinedi:
birinshi top – halyqaralyq jáne ulttyq deńgeıdegi JOO
ekinshi top – óńirlik deńgeıdegi JOO,
úshinshi top – salalyq deńgeıdegi JOO.
Qalǵan jańadan ashylǵan JOO-lar tórtinshi topqa jatady.
Sondaı-aq, joǵary oqý oryndaryn toptar boıynsha jikteý bilim berý, ǵylymı qyzmet, ınternasıonaldandyrý nátıjelerine, el, óńir jáne (nemese) sala ekonomıkasyna qosqan úlesine negizdelmek. Joǵardy atalǵan úsh topqa kiretin JOO bilim berý baǵdarlamalaryn akkredıttep, olardyń kásibı standarttarǵa sáıkestigin qamtamasyz etýi qajet. Al ǵylymı qyzmettiń tabystylyǵy profesorlyq-oqytýshylyq quramnyń dáıeksózdilik deńgeıine, ǵylymı kollaborasıaǵa, ǵylymı jobalardy komersıalandyrýdan túsetin kiristerge, reıtıńtik jýrnaldardaǵy jarıalanymdar sanyna baılanysty aıqyndalady.