30 oqýshy saltanatty túrde ant berdi.
Mańǵystaý oblysy Aqtaý qalasynyń N22 orta mektebi men mamandandyrylǵan IT-lıseıiniń 30 oqýshysy saltanatty túrde ant berip, resmı túrde «Jas sarbaz» qozǵalysynyń qataryna qosyldy, dep habarlaıdy Almaty-akshamy.kz Qorǵanys mınıstrliginiń baspasóz qyzmetine silteme jasap.
Saltanatty rásim Kaspıı teńiziniń jaǵalaýynda ótti. Oǵan Aqtaý garnızonynyń áskerı qyzmetshileri, Qarýly Kúshterdiń ardagerleri, qoǵam ókilderi qatysty.
Jasóspirim balalar qozǵalysynyń qataryna qosylatyndarǵa arnap áskerı-teńiz bazasynyń bastyǵy, 2-dárejeli kapıtan Baýyrjan Muratuly, Qarýly Kúshterdiń ardageri Qaırat Tólepbaev jáne "Jas sarbaz" respýblıkalyq áskerı-patrıottyq qozǵalysynyń tóraǵasy Meıirbek Meńdiǵalıev sóz sóıledi. Olar jas urpaqqa el ıgiligi jolynda adal qyzmet etýge tilektestigin bildirdi.
«Qazir ózimniń jas sarbaz, jas teńizshi ekenimdi maqtan tutamyn. Bárinen de áskerı-teńiz bazasyna barǵanymyz qyzyqty ótti. Bolashaqta Otanymdy qorǵap, áskerı qyzmetshi bolýdy armandaımyn», – dedi alǵan áserimen bólisken №22 orta mekteptiń 9 synyp oqýshysy Eldos Súleımen.
İs-shara barysynda jas patrıottarǵa «Mańǵystaý» zymyrandy-artıllerıalyq korablin aralatty. Áskerı teńizshiler onyń qurylysy men múmkindikteri týraly aıtyp, qural-jabdyqtaryn, kaıýtalary men qarý-jaraqtaryn kórsetti.
Áskerı-Teńiz kúshteriniń matrostary ózderiniń merzimdi qyzmet tájirıbesimen bólisip, kúndelikti jumys kúnderi men oqý-jaýyngerlik qyzmeti qalaı ótip jatqanyn aıtty.
Qazirgi ýaqytta «Jas sarbaz» respýblıkalyq qoǵamdyq birlestigi 7000-nan astam áskerı-patrıottyq klýbtyń basyn qosty. Olardyń 100-den astamy áskerı bólimderdiń janynda ornalasqan. Jalpy qamtıtyn bala sany 2600-den asady. Buǵan 230 000-nan astam tárbıelenýshi balany qamtıtyn «Jas sarbaz» synyptary men Smart Sarbaz úıirmeleri de kiredi.
