Kásiporyn Skoda Holding-tiń quramyna kiredi.
Premer-Mınıstr Álıhan Smaıylov Skoda Transportation kompanıasynyń dırektorlar keńesiniń tóraǵasy Dıde Pflegermen kelissóz júrgizdi, dep habarlaıdy Almaty-akshamy.kz Úkimettiń resmı resýrsyna silteme jasap.
Taraptar respýblıkada temirjol jáne qalalyq qoǵamdyq kólik shyǵarý, tehnıkalyq qyzmet kórsetý jáne jańǵyrtý jónindegi jobalardy iske qosý perspektıvalaryn talqylady.
Premer-Mınıstr ınvestorlar úshin túrli salyqtyq jáne kedendik jeńildikter qarastyrylǵanyn eskere otyryp, kompanıanyń elimizde naqty jobalardy júzege asyratynyna senim bildirdi. Osy oraıda ol lokalızasıasy joǵary jáne tolyq sıkldi óndiris ashý máselesin qarastyrýdy usyndy.
«Qazaqstan Úkimeti mashına jasaý salasyna erekshe kóńil bóledi, sondyqtan biz sheteldik áriptestermen yntymaqtastyq ornatýǵa múddelimiz. Sondaı-aq birlesken jobalardy iske asyrýǵa qazaqstandyq mashına jasaý kásiporyndaryn tartýǵa bolady dep sanaımyz», - dedi Álıhan Smaıylov.
Ol Skoda Transportation kompanıasymen ózara tıimdi yqpaldastyqty pysyqtaý úshin barlyq múddeli memlekettik organdar men uıymdardyń qatysýymen arnaıy jumys toby qurylǵanyn atap ótti.
Óz kezeginde Dıde Pfleger kompanıa jańa naryqtardy baǵyndyrýǵa daıyn ekenin, sondyqtan óz óndiristerin ornalastyrý jáne damytý úshin Qazaqstandy perspektıvti seriktes retinde qarastyryp otyrǵanyn atap ótti.
Kezdesý qorytyndysy boıynsha taraptar ózara tıimdi jobalardy ázirleý boıynsha belsendi jumysty jalǵastyrý jóninde kelisti.
Chehıalyq Skoda Transportation mashına jasaý kompanıasy – ár túrli kólik túrlerin, onyń ishinde metro, tramvaı, troleıbýs, temirjol vagondary, elektr poıyzdary men elektr avtobýstaryn shyǵaratyn jetekshi eýropalyq óndirýshilerdiń biri. Kásiporyn Skoda Holding-tiń quramyna kiredi.