Májilistiń jalpy otyrysynda Ulttyq bank tóraǵasy Erbolat Dosaev elimizde ınflásıanyń ósýiniń negizgi sebepterin aıtty, dep habarlaıdy almaty-akshamy.kz QazAqparatqa silteme jasap.
«Bıylǵy jyldyń ekinshi jartyjyldyǵynan bastap Qazaqstanda ınflásıa tutynýshylyq belsendiliktiń tez qalpyna kelýi, ekonomıkany fıskaldyq yntalandyrýdyń jalǵasýy jáne jekelegen taýar naryqtaryndaǵy teńgerimsizdikteri nátıjesinde ósti», - dedi E. Dosaev.
Onyń aıtýynsha, azyq-túlik baǵasynyń ósýi negizgi ınflásıaǵa qarsy faktor boldy, ol jalpy ınflásıaǵa jartysynan kóp úles qosady. Azyq-túlik ınflásıasy bıylǵy qyrkúıekte ýaqytsha jáne ornyqty faktorlardyń áserinen 11,5%-ǵa deıin jyldamdady.
«Osy jylǵy shilde-tamyzda jaz aılaryna tán emes jáne uzaq saqtalatyn kókónister (kartop, sábiz, qyzylsha) baǵasynyń sońǵy jyldardaǵy rekord ósýi tirkeldi. Et, ósimdik maıy jáne qant baǵasynyń ósýi ınflásıany jyldamdatýdyń turaqty faktory bolyp qalýda, bul ósý deńgeıin álemdik úrdistermen salystyrýǵa bolady. FAO derekterine sáıkes, bir jylda ettiń álemdik baǵasy orta eseppen 26,3%-ǵa, ósimdik maıynyń baǵasy – 61,2%-ǵa, qanttyń baǵasy – 53,5%-ǵa ósti», - dedi UB basshysy.
Onyń sózine qaraǵanda, birinshi kezekte tutynýshylyq belsendiliktiń qalpyna kelýi aıasynda janar-jaǵar maı jáne uzaq paıdalanylatyn taýarlar baǵasynyń ósýi nátıjesinde Qazaqstanda azyq-túlikke jatpaıtyn ınflásıa 7,5%-ǵa deıin jyldamdady.
«Aqyly qyzmetter ınflásıasy negizinen elektr energıasy, turǵyn úıdi jaldaý jáne kólik qyzmetteri baǵasynyń ósýi esebinen 6,8%-ǵa deıin jyldamdady», - dedi E. Dosaev.