Bedeldi jobalardyń biri kelesi aptada bastalady
Onlaın formatta ótetin shara úsh kúnge sozylady. Onyń basty maqsaty – Ortalyq Azıa men Kavkazdy álemdik ozyq ınovasıalyq baǵyttarǵa ıntegrasıalaýǵa yqpal etý, dep habarlaıdy Almaty-akshamy.kz
Ǵylymı bilim berý sharasyna álemdik ǵylym salasynyń maıtalmandary, ǵalymdar, bıznes-kóshbasshylar men bastamashylar qatysady. Olardyń ishinde Nobel syılyǵynyń 10 laýreaty jáne «Serpilis úshin» syılyǵynyń 10 laýreaty bar. Olar Qazaqstan, Ózbekstan jáne Ázirbaıjandaǵy stýdıalarǵa baryp, álemge ashyq habar taratady.
Nobel Fest baǵdarlamasy qazirgi zamannyń jahandyq syn-qaterlerine jaýap beretin negizgi 4 baǵytqa bólinedi: jasyl shynaıylyq, ınovasıa ǵasyry, bolashaq mamandyqtar jáne qoǵamǵa arnalǵan ekonomıka. Festıvál aıasynda stýdentter úshin arnaıy onlaın sabaqtar ótedi.
«Tikeleı kórsetilim 5 tilde ótedi: qazaq, aǵylshyn, orys, ózbek jáne ázirbaıjan. Barlyǵy úsh negizgi stýdıa jumys isteıdi. Bul – Nur-Sultan, Baký jáne Tashkent qalalaryndaǵy stýdıalar, sondaı-aq Qazaqstan ýnıversıtetterinde de stýdıalar jumys isteıdi. Festıválge barlyǵy 200 ýnıversıtet, 70 elden 50 myńǵa jýyq qatysýshy qatysady», - deıdi Qazaqstandaǵy ınklúzıvti damý qorynyń dırektory Maqsat Qurbenov.