Medısınalyq medbıkeler men meıirgerlerge suranys joǵary.
Qazaqstannyń eńbek naryǵynda medısınalyq medbıkeler men meıirgerlerge, sanıtarlar, tárbıeshiler men olardyń kómekshilerine suranys joǵary bolyp otyr, dep habarlaıdy Almaty-akshamy.kz.
«Aǵymdaǵy jyldyń naýryz aıynyń qorytyndysy boıynsha, EEB-da óte tapshy medısınalyq medbıkeler men meıirgerler, sanıtarlar, tárbıeshiler men olardyń kómekshileri boldy. Bul mamandar úshin qamtylmaǵan qajettilik 4,6 myńdy qurady. Sondaı-aq, júrgizýshiler (2 myń bos oryn), kúzetshiler (1,6 myń bos oryn), konsýltant-satýshylar (618 bos oryn) jáne elektromonterlar (674 bos oryn) suranysqa ıe boldy», - delingen Eńbekmıni baspasóz qyzmetiniń habarlamasynda.
2022 jylǵy naýryzda Elektrondyq eńbek bırjasynda 72,7 myń bos jumys orny jáne 48,8 myń túıindeme ornalastyryldy. Ótken aımen salystyrǵanda, jarıalanǵan bos oryndar sanynyń shamaly ósýi (+0,5%) jáne izdenýshiler tarapynan belsendiliktiń kúrt tómendeýi (-11%) baıqalady.
Osylaısha, eger aǵymdaǵy jyldyń aqpan aıynda bos oryndar sany túıindeme sanynan 32%-ǵa asyp ketse, naýryz aıynda bos oryndar men izdenýshiler arasyndaǵy alshaqtyq shamamen 50%-dy qurady.
«Óńirlik bóliniste bos oryndar sany Jambyl (+28% nemese 3,4 myń bos orynǵa deıin), Pavlodar (+22% – 5,9 myń bos orynǵa deıin), Soltústik Qazaqstan (+14% – 2,5 myń bos orynǵa deıin) jáne Batys Qazaqstan (+12% – 3 myń bos orynǵa deıin) oblystarynda ósti.
Naýryzda erler men áıelder teń jumys izdedi. Bul rette jas bólinisinde, aldyńǵy aıdaǵydaı, izdenýshilerdiń úshten biri jastar arasynan, al árbir tórtinshi – neǵurlym jetilgen jasta (46 jas jáne odan joǵary) boldy.
«Sonymen qatar, EEB málimetteri boıynsha, naýryz aıynda jumys kúshine suranys pen usynystyń teńgerimsizdigi baıqaldy. Máselen, eger jalpy naryqta orta bilikti mamandarǵa suranys basym bolsa (54%), onda osy sanattaǵy usynys bar bolǵany 38%-dy quraıdy. Bul rette biliktiligi tómen mamandar úshin keri jaǵdaı qalyptasyp otyr-suranys 21% bolǵan kezde usynys shamamen 35%-dy quraıdy. Joǵary bilikti kadrlar úshin túıindemeler men bos jumys oryndarynyń sany teń úlesti quraıdy: tıisinshe 26% jáne 25%», – dep atap ótti «Eńbek resýrstaryn damytý ortalyǵy» AQ Basqarýshy dırektory Aleksandra Molchanovskaıa.