Bolashaq zaýyttarda jol-qurylys tehnıkasy men turmystyq as úı plıtalary shyǵarylady.
QR Indýstrıa jáne ınfraqurylymdyq damý mınıstri Beıbit Atamqulov elimizde mamandandyrylǵan arnaıy tehnıkalar qurastyrý jónindegi jobalardy iske asyratyn sheteldik jáne otandyq kompanıalardyń basshylarymen kezdesti, dep habarlaıdy Almaty-akshamy.kz
Mınıstrdiń JCB kompanıasynyń Reseı men TMD-daǵy jetekshisi jáne Orbis Kazakhstan kompanıasynyń Bas dırektory Nıkolas Grılspen kezdesýi barysynda taraptar JCB brendiniń mamandandyrylǵan jol-qurylys tehnıkasyn qurastyratyn óndiris ashý týraly jobasyn talqylady. Nıkolas Grıls QR Úkimeti tarapynan otandyq óndirýshilerge úlken qoldaý kórsetiletinin atap ótip, JCB kompanıasynyń Qazaqstan naryǵyna uzaq merzimge keletini týraly nıetin bildirdi.
Orbis Kazakhstan kompanıasy Ózbekstannyń Artel Electronics kompanıasymen birlese otyryp, Túrkistan oblysynda turmystyq as úı plıtalaryn shyǵaratyn zaýyt salý josparyn jarıalady. Zaýyttyń óndiristik qýaty jylyna 1 mln. turmystyq tehnıkany quraıdy. Bul joba Qazaqstannyń eksporttyq áleýetin arttyryp, naryqty otandyq óndiristiń sapaly ári qoljetimdi turmystyq tehnıkasymen qamtamasyz etedi.
Mınıstr otandyq óndiristi damytýǵa baǵyttalǵan memlekettik saıasat sheńberinde bul bastamalardy qoldaýǵa daıyn ekenin bildirip, Qazaqstan Respýblıkasynyń kólik quraldary men túrli tehnıkany qurastyrý jónindegi iri ortalyq retinde álemdik tizbekke enýi qajettigi týraly aıtty.