«Kásipkerlik belsendilikti arttyrý» ulttyq jobasy ázirlendi.
Qazaqstan Úkimeti memleket azamattaryna ózin isin ashýǵa jáne kásipkerlikti damytýǵa kómektesetin boldy. Osy maqsatta arnaıy joba ázirlendi, dep habarlaıdy Almaty-akshamy.kz.
Atalmysh joba boıynsha, halyqtyń tabysyn arttyrý úshin jaǵdaı jasalýy tıis.
«Memleket basshysynyń memlekettik baǵdarlamalardy ulttyq jobalarǵa transformasıalaý jónindegi tapsyrmasyn oryndaý maqsatynda 2021-2025 jyldarǵa arnalǵan «Kásipkerlik belsendilikti arttyrý» ulttyq jobasy ázirlendi. Onda oqytý, jumyspen qamtýǵa járdemdesý jáne bızneske tartý arqyly jumyspen qamtý deńgeıin jáne halyqtyń tabysyn arttyrý úshin jaǵdaı jasaý boıynsha birqatar mindetter kózdelgen», – delingen Eńbek jáne halyqty áleýmettik qorǵaý mınıstrliginiń habarlamasynda.
Ulttyq jobany iske asyrý sheńberinde QR Eńbek jáne halyqty áleýmettik qorǵaý mınıstrligi (budan ári – Eńbekmıni) eki negizgi baǵyt boıynsha jumys júrgizedi: óz isin ashý jáne damytý úshin jaǵdaı jasaý, sondaı-aq sýbsıdıalanatyn jumys oryndaryn uıymdastyrý arqyly kásipkerlerdi qoldaý; kásipkerlerdiń qajettilikterine qaraı daǵdylardy damytý.
«Baǵyttar men mindetter búgingi tańda eńbek naryǵyndaǵy syn-qaterler men táýekelderdi negizge ala otyryp aıqyndalǵan. Óz isin ashý jáne damytý úshin jaǵdaı jasaý boıynsha aýyl halqyna basa nazar aýdarylatyn bolady. Aýyldyq jerlerdegi negizgi problema – bul eńbek naryǵy men jumys oryndarynyń shekteýliligi, sondaı-aq ótkizý naryǵynyń az kólemine baılanysty kásipkerlikpen aınalysý múmkindiginiń tómen bolýy. Kóbinese aýyl kásipkerleri óz ónimderin sata almaıdy», – deıdi Eńbekmıniniń Halyqty jumyspen qamtý departamenti dırektorynyń orynbasary Rýslan Tileýbaev.
Budan basqa, eńbek resýrstarynyń quzyreti ekonomıka suranystarynan artta qalyp otyr, tipti ózekti tehnıkalyq daǵdylar árbir 5 jyl saıyn eskirip keledi.
«Qyzmetkerlerdiń biliktiligi men daǵdylary jumys isteıtin halyqtyń jalaqysy men tabysynyń deńgeıine tikeleı baılanysty. Sarapshylardyń esepteýinshe, qazaqstandyq qyzmetkerler EYDU elderi jumyskerleriniń daǵdylarynyń ortasha deńgeıi bolǵan jaǵdaıda qosymsha 24 mlrd AQSH dollaryn taba alar edi», – dep atap ótti Rýslan Tileýbaev.
Aǵymdaǵy mindetterdi sheshý úshin júıeli jumys júrgiziletin bolady.
Osylaısha, kásipkerlerdiń jumys jaǵdaılaryn jasaý jáne jaqsartý úshin óndiristik-ótkizý tizbekteri qalyptastyrylyp, aýyl sharýashylyǵy kooperasıalary nyǵaıtylatyn bolady.
«Birinshi kezekte árbir aýdan men shaǵyn qalalar úshin bıznes taýashalardyń áleýetin kórsetetin master-josparlar ázirlenedi, olardyń negizinde bıznes-jobalar irikteletin bolady. Óndiristiń naqty keısterin modýldik oqytý, bıznes-josparlardy ázirleý boıynsha bastamalar kózdelgen. Budan ári ónim óndirýshiler men satyp alýshylar toǵysady jáne ónimdi kepildi ótkizý men satyp alý qamtamasyz etiledi», – dep atap ótti Rýslan Tileýbaev.
Bul rette kásipkerlerdi tıimdi qoldaý úshin eńbek naryǵynda neǵurlym qıyndyqtarǵa tap bolǵan jastar, múgedektigi bar adamdar jáne zeınetkerlik jas aldyndaǵy adamdar – azamattardy jumysqa ornalastyrý úshin jumys oryndaryn sýbsıdıalaý arqyly eńbek naryǵyn damytý kózdelgen.
Halyqtyń osy sanattaryn jumyspen qamtýǵa tartý úshin ozyq halyqaralyq tájirıbe negizinde ázirlengen quraldar paıdalanylatyn bolady:
– «Urpaqtar kelisimsharty» jobasy, ol zeınetkerlik jas aldyndaǵy tulǵalardan 25 AEK mólsherinde jalaqysyn sýbsıdıalaı otyryp, olardyń jastarǵa tájirıbesin berýdi kózdeıdi;
– NEET býyndy jastardy jumysqa ornalastyrýǵa arnalǵan «Alǵashqy jumys orny» jobasy, olardyń jalaqysy 20 AEK kóleminde sýbsıdıalanady:
– zeınetkerlik jas aldyndaǵy adamdar úshin jalaqyny qosa qarjylandyra otyryp (50%), jumys oryndaryn qurýdy kózdeıtin «Kúmis jas» jobasy;
– múgedektigi bar adamdy jumysqa ornalastyrý úshin «Áleýmettik jumys oryndary» jobasy;
– «Qoǵamdyq jumystar» jobasy uzaq merzimdi jumyssyz júrgen adamdardy jumysqa ornalastyrýǵa arnalǵan.
Sondaı-aq, jumys berýshilerdiń suranystary negizinde kásiptik daǵdylardy damytý jáne suranysqa ıe mamandyqtarǵa, onyń ishinde Elektrondyq eńbek bırjasynyń portaly arqyly onlaın rejıminde oqytý júrgiziletin bolady. Oqýdan ótkenderdiń taǵylymdamasy jumys ornynda tálimgerlermen birge ótetin bolady, al jalaqysynyń bir bóligin memleket sýbsıdıalaıdy.
2025 jylǵa qaraı Ulttyq jobany iske asyrý nátıjesinde Nur Otan partıasynyń saılaýaldy tuǵyrnamasynyń Jol kartasyna sáıkes jumyspen qamtýǵa járdemdesýdiń belsendi sharalarymen 3,1 mln adam qamtylatyn bolady, olardyń 1,6 mln-y turaqty jumysqa ıe bolady, al jumyssyzdyq deńgeıi 5-ten 4,7% - ǵa deıin tómendeıdi.