Balalardyń qoǵamdyq oryndarǵa barýyn shekteýge tyrysý kerek.
COVID-19 beıimdelip, mýtasıaǵa ushyrady. Eger ótken jyly Almatyda derttiń aýyr túrimen aýrýhanaǵa jatqyzylǵan balalardyń sany 10-15%-dan aspasa, bıyl jańa shtamm ınfeksıanyń aǵymyna jáne belgilerine ózgerister engizdi. Bul týraly qalalyq klınıkalyq balalardyń ınfeksıalyq aýrýhanasynyń bas dárigeri Erjan Seralın aıtty, dep habarlaıdy Almaty-akshamy.kz.
Erjan Seralınniń aıtýynsha, balalar koronavırýspen jıi aýyrady, biraq olarda aýrýǵa eresekterdegideı ımýndyq jaýap joq, ádette aýrýdyń aǵymy olarda jeńil bolady.
«Bul balalarǵa saq bolý qajet emes degendi bildirmeıdi, óıtkeni balalardyń álsiregen ımýnıtetpen dertti juqtyrýy, sozylmaly aýrýlary bolsa, onda koronavırýstyń qaýipti bolýy múmkin ekenin umytpaǵan jón», - dedi bas dáriger.
Onyń ústine, balalar – koronavırýstyń ámbebap tasymaldaýshylary, sondyqtan eresekter jaýapty bolýy kerek, vaksınalanǵan bolsa da, qoǵamdyq oryndarda betperde men áleýmettik qashyqtyqty eskergen jón.
Erjan Seralın ınfeksıaǵa bir jasqa deıingi balalardyń da beıim ekenin aıtty.
«Jas shekteýi joq, kóbinese bul mobıldi jastaǵy balalar. Klınıkalyq kóriniske keletin bolsaq, eger ótken jyly kataraldy belgiler basym bolsa, bıyl kataraldy sındrommen qatar asqazan-ishek joldarynyń buzylý jıiligi, sondaı-aq letargıa, appetıt pen temperatýranyń tómendeýi sıaqty jalpy ıntoksıkasıa belgileri baıqalady. Bizdiń aýrýhanaǵa ortasha aýyrlyqtaǵy balalar jıi túsedi. Derti asqynǵan balalar da bolady. Árıne, derttiń aýyrlyǵy men barysy balanyń bastapqy jaǵdaıyna, anamnezde burynnan bar aýrýlardyń qatar júrýine de baılanysty ekenin atap ótken jón», - dedi Erjan Seralın.
Qalalyq klınıkalyq balalardyń ınfeksıalyq aýrýhanasynyń bas dárigeriniń aıtýynsha, balalar dertti úıdegi eresektermen baılanys kezinde juqtyrady.
«Balalar arasyndaǵy dert juqtyrý eresek turǵyndar arasynda juqtyrýdyń artymen tikeleı baılanysty. Eresekter arasynda juqtyrý tómendese, onda balalar arasynda indet juqtyrý da azaıady. Al derttiń aldyn alatyn jalpyǵa ortaq jalǵyz tıimdi jol - vaksına saldyrý. Sonda ǵana biz ózimizdi de, balalarymyzdy da qaýipti dertten qorǵaı alamyz», - dep jalǵastyrdy sózin Erjan Seralın.
Balalardaǵy koronavırýstyń asqynýy pnevmonıanyń órshýinen baıqalady, jıi emes, biraq qaýipti postkovıdty qabyný sındromy kóptegen organdar men júıelerdiń zaqymdaıdy.
«Bizdiń klınıkada juqpaly aýrýlardyń jetekshi mamandary men reanımatologtar, mamandandyrylǵan nevropatologtar, kardıologtar, pýlmonologtar, endokrınologtar, nefrologtar, hırýrgtar táýlik boıy baılanysta bolatyn mýltıdısıplınarly top quryldy. Árbir kúrdeli klınıkalyq jaǵdaı talqylaýǵa shyǵarylady. Qajet bolǵan jaǵdaıda sozylmaly aýrýlarǵa qarsy terapıalyq korreksıa júrgiziledi. Biz ár balaǵa óte muqıat qaraımyz, barlyq qajet saraptamalar men qosymsha tekserýlerdi úlken jaýapkershilikpen júrgizemiz», - dedi Erjan Seralın.
Dáriger adamdar kóp jınalatyn jerlerge, qoǵamdyq kólikte, kafeler men saýda ortalyqtaryna barǵanda ınfeksıa qaýpi áli de joǵary ekenin eske saldy. Sondyqtan burynǵydaı aldyn alý sharalaryn saqtap, balalarǵa osyny úıretý qajet.
«Jaqynda, koronavırýstan basqa, maýsymdyq JRVI jáne tumaý aýrýlary beleń alatyn bolady. Koronavırýstan aıyrmashylyǵy, bul ınfeksıalar balalardy aıamaıdy jáne olarda eresekterge qaraǵanda aýyr bolýy múmkin. Sondyqtan, búginde balalardyń qoǵamdyq oryndarǵa barýyn shekteýge tyrysý kerek jáne qajet bolǵan jaǵdaıda ǵana olarmen birge bolyp, qoǵamdyq kólikte qashyqtyqty saqtaý jáne medısınalyq maskany durys taǵý kerek», - dep usynys bildirdi dáriger.