Qazaqstanda halyq sanaǵy aıasynda júrgizilgen naqtylaý jumystary aıaqtaldy, dep habarlaıdy almaty-akshamy.kz Ulttyq statısıka búrosyna silteme jasap.
8 qarasha kúni saǵat 00:00-de «Halyq sanaǵy-2021» aıasynda júrgizilgen naqtylaý jumystary aıaqtaldy. Negizgi kezeń jáne naqtylaý jumystary qorytyndysy boıynsha saýalnamamen 19,6 mıllıonnan asa respondent qamtyldy.
Bul kezeńde qandaı da bir sebeptermen sanaqqa qatysa almaǵan respondentterge arnaıy sanaq.gov.kz saıty, e-Gov portaly jáne Aitu mobıldi qosymshasy arqyly sanaq saýaldaryn toltyrý múmkindigi berildi. Búginde ulttyq statısıka búrosy derekterdi óńdeýge kiristi. Josparǵa sáıkes aýqymdy is-sharanyń aldyn ala qorytyndylary aǵymdaǵy jyldyń jeltoqsan aıynda jarıalanatyn bolady.
Esterińizge sala keteıik, shara aıasynda elimizde turaqty turyp jatqandardan ózge 12 aıdan asa ýaqytqa shetelge issaparmen shyqqandar (sheteldegi dıplomatıalyq korpýs pen QR ókildiginiń qyzmetkerleri men olardyń otbasy músheleri), kelisimshart negizinde bir jyldan kem ýaqytqa basqa elge ketken otandastarymyz, ózge memlekette «Bolashaq» baǵdarlamasy aıasynda bilim alyp jatqan stýdentter, ýaqytsha shetelge shyqqan týrıser, ýaqytsha (12 aıdan az) elimizde júrgen sheteldikter, azamattyǵy joq adamdar men bosqyndar sanaqtan ótýde. Halyq sanaǵyn ótkizý ádistemesine sáıkes, saýalnama aıaqtalǵan soń naqty jáne turǵylyqty halyq sany boıynsha aqparat alynatyn bolady.
Bul sanattar neni bildiredi? «Naqty halyq» degenimiz, sanaq ótkizý kezindegi belgili bir eldi mekendegi adamdardyń sanyn bildiredi. Bul sanatqa turǵylyqty turǵyndarmen qatar, ýaqytsha kelgender men rezıdent emes tulǵalar jatqyzylady.
Iaǵnı, munda eldi mekenge qonaqqa, demalýǵa, jumys babymen jáne t. b. maqsatta, sondaı-aq, elde ýaqytsha júrgen sheteldikter, azamattyǵy joq adamdar men bosqyndar qamtylady.
«Turǵylyqty halyq» degen sanatta eldi mekende turaqty turyp júrgendermen qatar, ýaqytsha basqa jaqqa shyǵyp ketken azamattar qamtylady. Olardyń qataryna basqa eldi mekenge nemese shetelge týystaryna, eńbek demalysyna, jumys babymen nemese basqa da sebeptermen ýaqytsha ketkender kiredi. Alǵash ret sanaq saýaldary kezinde qaǵaz tasymaldaǵyshtar tolyǵymen alynyp tastaldy.
Respondentterge arnaıy sanaq.gov.kz saıty, e-Gov portaly jáne Aitu mobıldi qosymshasy arqyly sanaq saýaldaryn toltyrý múmkindigi berildi. Respondentterdiń 42 prosentten astamy onlaın-sanaq fýnksıasyn paıdalandy.
Aqyly qyzmet kórsetý týraly shartqa sáıkes jumys istegen ıntervúerler planshetterdi paıdalandy.