Eýrazıalyq ekonomıkalyq odaqtyń jumysynan zor nátıje kútemiz.
Prezıdent Qasym-Jomart Toqaev Eýrazıalyq ekonomıkalyq odaqqa múshe memleketter úkimetteriniń basshylarymen kezdesti, dep habarlaıdy Almaty-akshamy.kz Aqorda saıtyna silteme jasap.
Jıynǵa Armenıa Premer-Mınıstri Nıkol Pashınán, Belarýs Premer-Mınıstri Roman Golovchenko, Qazaqstan Premer-Mınıstri Álıhan Smaıylov, Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Aqylbek Japarov, Reseı Úkimetiniń tóraǵasy Mıhaıl Mıshýstın, sondaı-aq baqylaýshy memlekettiń ókili retinde Ózbekstan Premer-Mınıstri Abdýlla Arıpov pen Eýrazıalyq ekonomıkalyq komısıa alqasynyń tóraǵasy Mıhaıl Másnıkovıch qatysty.
Memleket basshysynyń aıtýynsha, búgingi kezdesý geosaıası ahýaldyń óte qatty ýshyǵyp turǵan kezinde ótip jatyr.
«Bizdiń ekonomıkalyq odaǵymyz belgili sebepterge baılanysty sanksıalyq qarsylyqtardyń saldarynan týyndaıtyn saıası teketiresterdiń kúsheıýine jáne onyń elderimizdiń ekonomıkasy men qarjy júıesine keri áserine alańdaýshylyq bildiredi. Valúta baǵamyna, tólem júıesine, ekinshi deńgeıli bankterge qatysty táýekel-qaterler kúsheıe tústi. Biz Qazaqstanda daǵdarysqa qarsy sharalar qabyldap jatyrmyz. Bul tek basy ǵana, alda óte kúrdeli jumystar tur. Bul jumystardy Eýrazıalyq ekonomıkalyq odaq aıasyndaǵy áriptesterimizben kelise otyryp júrgizemiz dep oılaımyn. Ekonomıkalyq, qarjylyq jáne ónerkásiptik júıelerdegi tyǵyz yqpaldastyqty eskere otyryp, táýekel-qaterlerdi baǵalaýǵa jáne jaǵdaıdyń keri áserin tómendetýge baǵyttalǵan ekonomıkalyq sharalardy ázirleý úshin jumys tobyn qurý kerek», – dedi Prezıdent.
Qasym-Jomart Toqaev qarjy retteýshilerin qatystyra otyryp, ekonomıkalyq vedomstvolar deńgeıindegi atalǵan jumys tobyn uıymdastyrýdy usyndy. Úılestirý jumystaryn Eýrazıalyq ekonomıkalyq komısıa óz qolyna alýǵa tıis. Onyń pikirinshe, syrtqy makroortadaǵy kúrdeli jaǵdaıǵa qaramastan, Eýrazıalyq ekonomıkalyq odaqtyń ekonomıkalyq kórsetkishteri oń qarqyn kórsetýde.
«2021 jyldyń qorytyndysy boıynsha Odaqtyń syrtqy saýdasy 34 paıyzdan asty, al ishki saýda kóleminiń kórsetkishi odan da joǵary, ıaǵnı 67 paıyzǵa jetti. Bul – Eýrazıalyq odaqtyń ishki saýda-ekonomıkalyq baılanystarynyń nyǵaıǵanyn bildiretin jaqsy kórsetkish. İshki jalpy ónimniń jıyntyq ósimi – 4,4 paıyz. Bul boljanǵan kórsetkishten edáýir joǵary. Ózara saýda-sattyqty keńeıtý, ekonomıka salalaryndaǵy básekege qabilettilikti arttyrý jónindegi baǵytymyzdyń durys ekenine qýanyshtymyn», – dedi Memleket basshysy.
Qasym-Jomart Toqaev Eýrazıalyq úkimetaralyq keńestiń kún tártibi óte tyǵyz ekenin atap ótti. Onyń pikirinshe, barlyq másele, sonyń ishinde óte ózekti problemalar jemisti ári tabysty talqylandy.
Kezdesý barysynda Eýrazıalyq ekonomıkalyq odaqqa múshe memleketter úkimetteriniń basshylary eýrazıalyq ıntegrasıanyń qazirgi jáne perspektıvti máseleleri jóninde pikir almasty.
Premer-Mınıstrlerdiń sózin tyńdaǵan Qazaqstan Prezıdenti sońǵy oqıǵalarǵa baılanysty aýqymdy jumystar atqarý kerek ekenin atap ótti.
«Elderimizdiń úkimetteri asa kúrdeli problemalardy sheshýdiń tıimdi joldaryn tabýǵa tıis. Bul óte mańyzdy. Eýrazıalyq ekonomıkalyq odaqtyń jumysynan zor nátıje kútemiz. Biz bar kúsh-jigerimizben jáne eńbegimizben memleketterimizdiń strategıalyq múddelerine saı keletin Eýrazıalyq ekonomıkalyq odaqtyń abyroıy men bedelin saqtaýymyz qajet. Shyn máninde, azamattarymyz bul Odaqtan naqty nátıjeler kútedi», – dedi Qasym-Jomart Toqaev.
Kezdesý sońynda Qazaqstan Prezıdenti úkimetter basshylaryna ortaq maqsattar men mindetterdi júzege asyrý isinde tabys tiledi.
