Amerıka Qazaqstanǵa 1 mıllıon doza Faızer vaksınasyn tegin tartý etpek
Densaýlyq saqtaý mınıstrliginiń dereginshe, 2022 jylǵy 5 qarashadaǵy málimet boıynsha elimizde koronavırýsqa qarsy vaksınanyń I komponentimen 10 843 922 adam egilgen. Vaksınanyń II komponentin salǵyzǵandar 10 606 708 adamdy qurady. Al revaksınasıalanǵandar sany – 5 623 801 adamǵa jetipti. Jalpy alǵanda, egý jospary oryndaldy deýge keledi. Bul týraly Almaty-akshamy.kz Inbusiness.kz-ke silteme jasap habarlaıdy.
5 qarashadaǵy málimetke sáıkes, 708 adam koronavırýs ınfeksıasynan (-562 + jáne 146 KVI-) emdelýde. Olardyń ishinde 86 pasıent stasıonarda, 622 naýqas ambýlatorıalyq deńgeıde, úıinde em qabyldaýda. Dertke shaldyqqandar arasynda 5 adamnyń jaǵdaıy aýyr, 3 pasıenttiń jaǵdaıy óte aýyr. 1 naýqas ókpeni jasandy jeldetý apparatynda jatyr.
Resmı málimetke júginsek, 2020 jyldan beri 1 394 935 qazaqstandyq koronavırýs juqtyryp, onyń ishinde 13 692 adam qaıtys boldy. Buǵan qosa, KVI sımptomdary bar pnevmonıadan 5 360 adam ólgen.
DSM dereginshe, búginde COVID-19 indetinen ólim-jitim joq kórinedi. Táýligine 47 syrqat jańadan juqtyrǵan.
Soǵan qaramastan, vedomstvo pandemıanyń qaıta ýshyǵýyna daıyndalýda. Onyń ústine álemdegi birqatar elde sol burynǵydaı, vaksınasıalanýdy talap etedi. Elorda turǵyny Janıa Samatova aýyl-aımaq túgil, elordadaǵy emhanalardyń birde birinde Faızer vaksınasy joqtyǵyna nazar aýdartty. Onyń qyzy Eýropada oqıdy eken. Oqý orny DDSU moıyndaǵan vaksınany qaıtalama salǵyzýdy talap etedi.
Densaýlyq saqtaý mınıstri Ajar Ǵınıattyń aıtýynsha, Qazaqstanda "Komırnatı" (Pfizer) vaksınasyn koronavırýsqa qarsy egý 2021 jylǵy qarashada bastaldy.
"Bastapqyda bul vaksına tek jasóspirimderge, júkti jáne bala emizýshi áıelderge arnaldy. Al 2022 jylǵy mamyr men shilde aralyǵynda "Komırnatımen" egile alatyn kontıngent keńeıtildi. Nátıjesinde, osy kezeńde atalǵan vaksına azamattardyń barlyq sanattary úshin qoljetimdi boldy. Biraq búginde KVI-ge qarsy "Komırnatı" vaksınasy kóleminiń az qalǵanyna baılanysty, ony qoldaný qaıtadan 12–18 jas aralyǵyndaǵy jetkinshektermen, júkti jáne laktasıa kezindegi áıeldermen shekteldi", – dedi mınıstr.
Onyń habarlaýynsha, Qazaqstan jalpy alǵanda, byltyrdan beri "Komırnatı" (Faızer) vaksınasynyń 4 mıllıon dozasyn satyp alypty.
Qazaqstan qaýipsizdigin sol boıy dáleldeı almaǵan reseılik "Spýtnık V" vaksınasymaǵynan bas tartty.
"Qazaqstanda KVI-ge qarsy qoldanylatyn basqa barlyq vaksınalar birdeı deńgeıde qaýipsiz jáne koronavırýstyń aýyr saldarlarynyń aldyn alý úshin teńdeı tıimdi ekenin atap ótkim keledi. Mysaly, búginde 18 jastan eresek qazaqstandyqtarǵa otandyq "QazVak" vaksınasy, sondaı-aq "Sınofarm" vaksınasy qoljetimdi. Olar bastapqy vaksınasıa úshin de, revaksınasıa úshin de, sonymen qatar egilýdiń qaıtalama tolyq kýrsynan ótý úshin de qoldanylady", – dedi DSM basshysy.
Ol jergilikti medısınalyq uıymdarda bul vaksınalardyń qaısysy baryn naqtylaý úshin aýmaqtyq densaýlyq saqtaý basqarmasyna júginýge keńes berdi.
Degenmen elorda turǵyny Aleksandr Barannıkov otandyq vaksına da tapshy ekenin jetkizdi.
"Men 2022 jylǵy shildedede QazVak vaksınasyn salǵyzǵanmyn. Ekinshi ret egileıin desem, taba alatyn emespin. Emhanalarymyz bizde ondaı vaksına qazir joq deıdi. Bul bizdiń óz ekpemiz emes pe? Nege halyqty odan qaǵyp otyr? Emhanalarǵa habarlastym, olar QazVak Astananyń qoımalarynda da joq dep málimdedi. Álde memleket halyqty habardar etpeı, vaksınasıany toqtata salǵan ba", – dep qaıran qalady Aleksandr.
Densaýlyq saqtaý mınıstrligi "QazCovid-in" (saýda ataýy "QazVac") vaksınasynyń qolda bar kólemi tolyq paıdalanylǵanyn málim etti. Buǵan deıingi jetkizilim qyrkúıekte júzege asyrylypty. Qysqa qaraı jańa partıalary daıyndalyp, óńirlerge taratylady dep kútilýde.
Buǵan qosa, AQSH alda qazaq eline Faızer vaksınasynyń úlken partıasyn gýmanıtarlyq maqsatta jetkizbek. Osyǵan baılanysty DSM "Qazaqstan Respýblıkasynyń Úkimeti men AQSH Densaýlyq saqtaý jáne áleýmettik qamsyzdandyrý mınıstirligi arasyndaǵy gýmanıtarlyq kómek kórsetý týraly kelisimniń" jobasyn jarıalady.
Densaýlyq saqtaý mınıstri Ajar Ǵınıatqa Qazaqstan Úkimeti atynan Amerıkamen aradaǵy osy qujatqa qol qoıýǵa ókilettik berildi. AQSH Densaýlyq saqtaý jáne áleýmettik qamsyzdandyrý mınıstirligi atynan Loıs Peıs qol qoıady dep josparlanǵan.
Kelisim kúshine engen soń, 5–11 jastaǵy balalarǵa egý úshin AQSH-ta maquldanǵan, Pfizer-BioNTech óndirgen COVID-19 vaksınasynyń shamamen 500 000 dozasy jetkiziledi.
Budan bólek, eresekterge salý úshin Pfizer-BioNTech shyǵarǵan COVID-19 vaksınasynyń taǵy shamamen 500 000 dozasy gýmanıtarlyq kómek retinde Qazaqstanǵa beriledi.
Sondaı-aq kelisim aıasynda AQSH óz farmakopeıasynyń talaptaryna sáıkes, Fresenius Kabi kompanıasy shyǵarǵan ıneksıalyq natrıı hlorıdin qazaq eline tegin attandyrmaq. Onyń jalpy kólemi vaksına sanyna saı bolady.
AQSH-tyń málimdeýinshe, bul el osy arqyly álemde pandemıany tolyq joıýǵa kúsh salyp otyr.
"COVID-19 pandemıasy – bul jahandyq sıpatta qarsy turýdy qajet etetin dúnıejúzilik synaq. Sondyqtan AQSH Qazaqstan sıaqty óziniń halyqaralyq seriktesterimen birlese otyryp, qoǵamdyq densaýlyq saqtaý múddesi úshin pandemıany joıýǵa baǵyttalǵan úılestirilgen jáne kópjaqty áreketterdi júzege asyrýda", – dep habarlady AQSH Densaýlyq saqtaý jáne áleýmettik qamsyzdandyrý mınıstirligi (HHS).
Kelisimde atap ótilgendeı, HHS materıaldardyń kúıine nemese jaramdylyǵyna eshqandaı kepildik bermeıdi. Kelisimniń talaptaryna sáıkes, gýmanıtarlyq júk Qazaqstannyń kez kelgen áýejaıyndaǵy ákelý pýnktine jetkizilgen soń, kedendik resimdeýge deıin qazaqstandyq menshikke aınalady. Tıisinshe, ony saqtaýǵa, tasymaldaýǵa, egýge Qazaqstannyń ózi jaýap beredi.
Budan ózge, pandemıa qaıta órshise daıyn bolý úshin, DSM Faızer vaksınasynyń qosymsha partıalaryn satyp alý maqsatynda kelissózder júrgizip jatyr. Al jyl sońyna deıin jetkiziletin amerıkalyq vaksınalar tek jasóspirimder men júkti, jas bosanǵan analarǵa ǵana salynatyn kórinedi.