Taraptar saýda-ekonomıkalyq, ınvestısıalyq jáne óńiraralyq yntymaqtastyqtyń aǵymdaǵy jaǵdaıy men damý perspektıvalaryn talqylady
Qazaqstannyń Qytaıdaǵy Elshisi Shahrat Nuryshev QHR Komersıa mınıstriniń orynbasary – Halyqaralyq saýda boıynsha kelissózderindegi Qytaıdyń ókili (mınıstr deńgeıinde) Van Shoývenmen kezdesý ótkizdi, dep habarlaıdy Almaty-akshamy.kz SİM baspasóz qyzmetine silteme jasap.
İs-shara barysynda taraptar Qazaqstan men Qytaı arasyndaǵy saýda-ekonomıkalyq, ınvestısıalyq jáne óńiraralyq yntymaqtastyqtyń aǵymdaǵy jaǵdaıy men damý perspektıvalaryn talqylady. Atap aıtqanda, suhbattastar atalǵan salalarda yntymaqtastyqtyń jańa kózqarastaryn qalyptastyrý mańyzdylyǵyn atap ótti.
Ekijaqty yntymaqtastyqqa qosymsha «serpin» berý jáne qolaıly jaǵdaılar jasaý maqsatynda sharttyq-quqyqtyq bazany jetildirý taqyrybyna erekshe nazar aýdaryldy.
Sh.Nuryshev suhbattasýshynyń nazaryn elektrondyq komersıany qosa alǵanda, ekijaqty saýda kólemin arttyrý boıynsha turaqty yntalandyrý sharalaryn qabyldaý qajettigine aýdardy. Osy turǵyda qazaqstandyq dıplomat 2026 jylǵa deıingi saýda-ekonomıkalyq yntymaqtastyq baǵdarlamasyn kelisýdi jedeldetý, sondaı-aq saýda, ınvestısıalar jáne óńiraralyq ózara is-qımyl salalaryndaǵy jumys tetikterin jandandyrýdy usyndy. Elshi qazaqstandyq taraptyń Qytaıǵa otandyq mal sharýashylyǵy men aýyl sharýashylyǵy ónimderin jetkizý nomenklatýrasyn keńeıtýge daıyn ekenin málimdedi.
Sonymen qatar, Elshi Qazaqstan-Qytaı shekarasyndaǵy ótkizý beketteriniń tıimdi jumys isteýi jáne «Qorǵas» Shekara mańy yntymaqtastyǵy halyqaralyq ortalyǵynyń qyzmetin qaıta jandandyrý eki jaqty saýda úshin mańyzdy ekenin erekshe atap ótti.
Óz kezeginde Van Shoýven qytaılyq taraptyń QR-QHR arasyndaǵy máńgilik jan-jaqty strategıalyq áriptestikti odan ári nyǵaıtý maqsatynda eki el arasyndaǵy saýda jáne ınvestısıalar salasyndaǵy ózara is-qımyldy jandandyrýǵa daıyndyǵyn bildirdi. QHR Komersıa mınıstriniń orynbasary qazaqstandyq tarap usynǵan ekijaqty taýar aınalymynyń ósýin yntalandyrý jáne saýda-ekonomıkalyq yntymaqtastyq tetikterin jetildirý jónindegi sharalardy qoldady.
Taraptar DSU, SHYU, AÓSSHK jáne «Ortalyq Azıa - Qytaı» formaty sıaqty kópjaqty birlestikter sheńberinde tyǵyz ózara is-qımyl jasaýǵa kelisti.
Kezdesý qorytyndysy boıynsha taraptar kelissózder barysynda qol jetkizilgen ýaǵdalastyqtardy iske asyrý maqsatynda Qazaqstannyń Qytaıdaǵy Elshiligi men QHR Komersıa mınıstrligi arasyndaǵy tyǵyz árekettestikti jalǵastyrýǵa kelisti.