Qazaqstan Respýblıkasy Premer-Mınıstriniń birinshi orynbasary Roman Sklár men iri nemis kompanıalarynyń basshylary onlaın kezdesý ótkizip, onda logıstıka jáne kólik salasyn damytý salasyndaǵy yntymaqtastyq máseleleri talqylandy. Beınekonferensıaǵa Qazaqstan men Germanıanyń 100-ge jýyq memlekettik jáne isker top ókilderi qatysty.
Roman Sklár óz sózinde Qazaqstan men Germanıa arasyndaǵy kólik-logıstıkalyq keshendi damytýdaǵy áriptestiktiń mańyzdylyǵyn, sondaı-aq ózara tıimdi yntymaqtastyqty nyǵaıtý jáne damýdyń jańa joldaryn izdeý qajettigin atap ótti, dep habarlaıdy Almaty-akshamy.kz Primeminister.kz-ke silteme jasap.
Germanıa - Qytaıdan Qazaqstan arqyly tranzıtpen konteınerlik poıyz jóneltilgen birinshi eýropalyq memleket. Óz kezeginde Germanıa ekonomıkasynyń Shyǵys komıtetiniń bas atqarýshy dırektory Mıhael Harms Qazaqstandaǵy logıstıka jáne kólik salasynyń damýyna oń baǵa berip, kórsetkishterdi arttyrý boıynsha jumys qarqyndy jalǵasatynyna senim bildirdi, sondaı-aq qazaqstandyq seriktestermen yntymaqtastyqtyń senimdiligi jáne qol jetkizilgen barlyq ýaǵdalastyqtarǵa adaldyq bildirdi.
HHLA Hamburger Hafen und Logistik AG (Gambýrg porty) dırektory Tomas Lúte aldaǵy ýaqytta ózara tıimdi yntymaqtastyqty damytýdyń zor áleýetin atap ótip, Qazaqstandy negizgi seriktes dep atady. Kezdesýdiń basqa qatysýshylary da eki eldiń strategıalyq yntymaqtastyǵy men birlesken jobalardy júzege asyrýdyń aldaǵy perspektıvalaryna erekshe nazar aýdardy. Jıyn sońynda qazaqstandyq jáne nemis iri logıstıkalyq jáne kólik kompanıalarynyń ókilderiniń qatysýymen «suraq-jaýap» formatynda dástúrli talqylaý ótti.