Prezıdent Ýkraına daǵdarysyn óte aýyr dep sanaıdy
Memleket basshysy Qasym-Jomart Toqaev Germanıa Prezıdenti Frank-Valter Shtaınmaıermen telefon arqyly sóılesti, dep habarlaıdy Almaty-akshamy.kz Aqorda saıtyna silteme jasap.
Germanıa tarapynyń bastamasymen Memleket basshysy Qasym-Jomart Toqaev Germanıanyń Federaldy Prezıdenti Frank-Valter Shtaınmaıermen telefon arqyly sóılesti. Memleketter basshylary Ýkraınadaǵy ahýal jóninde jan-jaqty pikir almasty.
Frank-Valter Shtaınmaıer Reseı basshylyǵynyń Ýkraınaǵa qarsy áskerı is-qımyl bastaý jónindegi kútpegen sheshiminiń sebepterine qatysty Eýropa odaǵynyń belgili ustanymyn jetkizdi.
Áskerı is-qımyldar bul eldi gýmanıtarlyq apatqa alyp keldi. Qasym-Jomart Toqaev búkil memlekettiń BUU Jarǵysyndaǵy normalar men qaǵıdattardy berik ustanýǵa tıis ekenin aıtty. Prezıdent Ýkraına daǵdarysyn óte aýyr dep sanaıdy. Sondyqtan beıbit turǵyndardyń budan bylaı japa shekpeýi jáne Ýkraına aýmaǵyndaǵy azamattyq ınfraqurylymnyń tolyq qıraýyna jol bermeý úshin qaqtyǵysty beıbit jolmen sheshýdiń jańa dıplomatıalyq múmkindikterin qarastyrý kerek.
Qasym-Jomart Toqaevtyń aıtýynsha, Qazaqstan Ýkraına halqyna dári-dármek jáne basqa da qajetti azyq-túlik jaǵynan gýmanıtarlyq kómek kórsetýge daıyn. Qazirgi ýaqytta olardy kózdelgen jerge kólikpen jetkizý joldary qarastyrylyp jatyr.
Sonymen qatar Qazaqstan Úkimeti 435 azamatymyzdy óz Otanyna jáne 650-den astam adamdy Eýropa elderine evakýasıalaýǵa qol ushyn berdi.
Prezıdentter Ýkraına problemasy boıynsha ózara baılanys jasap turýǵa kelisti. Qasym-Jomart Toqaev pen Frank-Valter Shtaınmaıer eki eldiń qarym-qatynastary turaqty túrde ilgerilep kele jatqanyna nazar aýdardy. Buǵan Qazaqstan Prezıdentiniń 2019 jyly jeltoqsanda Germanıaǵa jasaǵan resmı sapary septigin tıgizdi.
Memleketimizdiń basshysy Germanıa Prezıdentin ózine yńǵaıly ýaqytta Qazaqstanǵa saparmen kelýge shaqyrdy. Frank-Valter Shtaınmaıer shaqyrýdy rızashylyqpen qabyl aldy.